Жаңалықтар 14.04.2022 сағат 10:20

«Жаяу адам жапырып өтеді»: Депутат шекара заставалары туралы шындықты айтты

Түрлі қару-жарақ сақталған шекара заставаларының қоршауларын жаяу адам жапырып, атты адам опырып өтеді. Арнайы мақсаттағы нысандардың дені күйреп тұр.
«Жаяу адам жапырып өтеді»: Депутат шекара заставалары туралы шындықты айтты
Фото: ашық дереккөз
Бөлісу
Бөлісу
Бөлісу

Мәжіліс депутаты Жанарбек Әшімжанов үкіметтік комиссия құрып, құрлықтағы және теңіздегі барлық шекара қызметін тексеріп шығуды ұсынды, деп хабарлайды Sputnik Қазақстан. 

Халық қалаулысы премьер-министр Әлихан Смайыловқа жолдаған депутаттық сауалында үкімет назарын елдегі шекара бөлімшелеріне аударды. Жанарбек Әшімжанов жақында Алматы облысы Панфилов ауданындағы Шекара басқармасы, Нарынқол-Ұйғыр ауданындағы "Райымбек" шекара заставасы, Кеген ауданындағы "Саты", "Рабат" шекара бөлімшелерін аралап, шекарашылардың әлеуметтік жағдайымен танысқанын жеткізді.

Сонымен қатар "Қастек", "Жамбыл", "Қарғалы", "Қаскелең", "Алма арасан" шекара бөлімшелеріне де барған. Аталған бөлімшелердегі әскерилер Қытай мен Қырғызстан шекарасын күзетеді. Депутаттың айтуынша, шекарашылардың тұрмыстық-әлеуметтік жағдайы сын көтермейді.

"Арнайы мақсаттағы нысандардың дені күйреп тұр. Шекарашылар тұратын ғимараттар күрделі жөндеуді, көгілдір отынмен қамтуды, жарықтандыруды, бейнебақылау мен электр жүйесін жабдықтауды талап етеді", - деді ол.

Халық қалаулысы маңызды нысандарды салу және күрделі жөндеу бойынша Алматы облысы әкімдігімен ортақ келісім бар екенін жеткізді. Шекара бөлімшелерінің инфрақұрылымы жол картасына да енген, бірақ мәселе әлі шешімін таппай отыр. Ал соңғы бес жылда қауіпсіздік саласына бөлінген қаржыда есеп жоқ, дейді депутат.

Мәселен, оның сөзінше, "Саты", "Рабат" заставасының шекарашылары 90-жылдары салынған ескі монша мен есік-терезесі аңғал-саңғал балабақшада тұрып жатыр. Панфилов ауданындағы шекара басқармасы 1892 жылы салынған ғимаратқа орналасқан. Шонжыдағы "Райымбек" заставасының әскерилері тұратын үйлер мен спортзал, кітапхана, мәжіліс залының төбесінен су ағып, қабырғалары сетінеп тұр.

"Түрлі қару-жарақ сақталған шекара заставаларының қоршауларын жаяу адам жапырып, атты адам опырып өтеді. Осыдан кейін шекаралық өңірлерге отбасымен барып қызмет етіп жүрген офицерлік құрам мен әскери борышын өтейтіндерге "шекарамызды қас қақпай күзетіңдер" деп қалай талап етеміз? Болашақ шекарашыларды қалай ынталандырамыз?", - деп қапаланды Жанарбек Әшімжанов.

Осыған байланысты депутат елдің құрлықтағы және теңіздегі барлық шекара қызметінің материалдық-техникалық базасы мен әлеуметтік нысандарын арнайы үкіметтік комиссиямен тексеруді, Алматы облысындағы шекарашылардың әлеуметтік-тұрмыстық жағдайын жеделдетіп шешуді ұсынды. Сонымен қатар, оның пікірінше, мектептерде отансүйгіштікті насихаттайтын бағдарламаларды күшейту керек.

Оқи отырыңыз

загрузка...

Соңғы жаңалықтар

Аптасына бір рет ең танымал мақалалардың дайджесін жібереміз

Қызықты материалдар