Қостанай облысында жергілікті ауқымдағы ТЖ режимі жарияланды, - деп хабарлайды Tengrinews.kz тілшісі облыс әкімдігінің баспасөз қызметіне сілтеме жасап.
Ведомство мәліметінше, облыс әкімдігінің резервінен зардап шеккендерге көмек көрсетілді. Бұл қатарда жатын орын және тамақ бар. 1800 адам эвакуацияланған. Мектептерде 200-ге жуық адам тұрақтаған. Көбі қауіпсіздігін тексеріп, өз үйлеріне оралған, қалғандары туыстарын паналаған.
Аймақ басшысының сөзінше, зардап шеккендердің жаңа үй салуға немесе өтемақы алуға мүмкіндігі бар. Үйлердің құрылысы қысқа мерзімде жүзеге асырылады.
Бүгінгі мәлімет бойынша, 108 ғимарат зардап шеккен, оның ішінде 98 үй толық өртенген. Қазір басты міндет өртті толық ауыздықтау екені айтылды.
Ірі кәсіпорындар мен шағын бизнес шет қалмаған, олар зардап шеккендерге барлық жағынан көмектеседі. Жақын арада барлығы қолдау көрсете алатын қор ашу жоспарланып отыр.
Еске салайық, бұған дейін Қостанай облысында көлік, пойыз қозғалысы қайта жанданғаны хабарланған болатын. Сондай-ақ, ТЖМ өкілі өрт кезінде он адам зардап шеккенін айтты.
Кейінірек ТЖ министрі Юрий Ильин 86 жастағы ер адамның денесі үйінді астынан табылғанын мәлімдеді. Ал өрт аумағы 43 мың гектарға жеткен еді.
ТЖ басшысы Мемлекет тарапынан Қостанай облысында орман өрті кезінде зардап шеккен үйлерді тез арада қалпына келтіруге көмек көрсетілетінін айтқан болатын. Сонымен қатар, өрт сөндіруге Қарулы Күштержұмылдырылды. Ал Қазақстан халқы Ассамблеясы көмек көрсету акциясын ұйымдастыратынын жариялады. Halyk bank Қостанай облысында орман өрті кезінде үйлері өртеніп кеткен отбасылар банктен миллион теңге көмек ала алатынын айтып, банк басшылығы үйлері жанып кеткен адамдардың Halyk Bank-тегі несиелерін есептен шығару туралы шешім қабылдады.
Қару-жарақ дүкенінде 3 қыркүйекте шыққан өрттен қаза болғандар саны 4 адамға жетті. Бас прокуратура Қостанай облысындағы өртке қатысты қылмыстық іс қозғады.
Сондай-ақ, ТЖМ Қостанай облысы ормандарында өртсөндірушілер тілсіз жаумен қалай күресіп жатқанын көрсететін сурет, видео жариялаған болатын.