Павлодар облысында оқушылар ауылдық клубта оқып жатыр

Павлодар облысында оқушылар бір жарым айдан бері ауылдық клубта оқып жатыр. Бұған мектептегі күрделі жөндеу жұмыстарының кешеуілдеуі себеп болған. Кішкентай ғана ғимаратта 50-ге тарта бала білім алуға мәжбүр, деп хабарлайды Stan.kz. 

Ал мұғалімдер тар жерде оқудың өте қиын екенін айтады. Оқушылар бір жарым айдан бері ауылдағы клубта оқуға мәжбүр. Тар ғимаратта қыстырылып- қымтырылып білім алуда. Бір мезетте екі сыныпқа сабақ қатар өтеді. Арасын шымылдық қана бөліп тұр.

“Бізге бұл жер ыңғайсыз. Бірінші сынып үшін өте қиын. Көрші сыныппен ортамызды шымылдық қана бөліп тұр. Интерактивті тақта жоқ, суықта дәретханаға шығу да мұң. Кейде отты көп жаққанда ыстықтан балалар маужырап, ұйықтап қалады”, – дейді Сарышығанақ мектебінің мұғалімі Елена Рахматулина.

Балаларының тар ғимаратта оқып жатқанына ата-аналар да қарсы.

“Осы мектепте менің екі қызым оқиды. Олар біреуі таңертең келеді, біреуі түстен кейін келеді. Және осы мәдениет орталығында оқу мүлдем ыңғайсыз. Мектебімізге қайтып оралғанын тезірек қалаймыз енді”, – дейді ата-аналардың бірі Дәуітбек Қаниев.

Мектеп директоры жөндеу жұмысы қазан айында аяқталады - деп сендірген болатын. Алайда, бұл әзірге құрғақ сөз секілді. Жауаптылар жұмыстың кешеуілдеуін мемлекеттік сатып алу рәсімінің тым ұзаққа созылуымен байланыстырады.

“Әрине, бізде ойладық былай кіреміз - деп жартысына. Осы мектептің жартысын бізге істеп береді - деп. Оқу жүре береді - деп. Енді мен қазір ойлаймын, қарашаның 10-не дейін мектептің жартысын кабинеттерді бізге істеп береді деп. Біз кіреміз деп”, – дейді мектеп директоры Қалимаш Баймұханова.

Облыстағы Голубовка ауылында да оқушылар бір жарым айдан бері ауылдық клубта білім алып жатыр. Ондағы мектептің құрылыс жұмыстарының да қашан аяқталары белгісіз.