Астанада қалдықтарды шығару бойынша аймақтық бағдарлама дайындалуда

Астана қаласы Табиғат ресурстары және табиғатты пайдалануды реттеу басқармасының хабарлауынша, Мемлекет басшысының Астанада қоқыс өңдеу саласын модернизациялау бойынша тапсырмасын жүзеге асыру аясында бірқатар жұмыстар атқарылуда.

Осы бағытта елорда әкімдігі тарапынан қалдықтарды шығару бойынша аймақтық бағдарламаны әзірлеу және қоқысты өңдеуде жаңа технологияларды пайдалану туралы шешім қабылданған болатын. Тамыз айында аталмыш бағдарламаны жүзеге асыру бойынша жұмыс тобының алғашқы отырысы өтті. Жиынға ҚР Энергетика министрлігінің, құзіретті мемлекеттік органдар мен қалалық кәсіпорындардың, ассоциациялар мен қоғамдық ұйымдар өкілдері қатысты.

Жиын қорытындысы нәтижесінде Астана қаласында аталмыш бағдарламаны жүзеге асыруға бағытталған техникалық тапсырма жобасы мен жұмыс тобының нақты жұмысы талқыланды, деп хабарлайды елорда әкімдігінің баспасөз қызметі.