$ 444.22 € 476.38 ₽ 4.82
Ине тығып үйретпек болған. Алматы облысындағы арнаулы интернаттың мұғалімі үй жұмысын орындамаған шәкіртін осылай жазалаған көрінеді. Ұстазының қорлығына шыдамаған бала болған жайды анасына айтып берген, деп хабарлайды Stan.kz "Астарлы ақиқат" бағдарламасына сілтеп.
Айжан Рахимованың сөзінше, ұлының денесі көгеріп, ине сұғылған қолы қанап, үйге келген.
"Әкесі жоқ, шешесі инвалид екен, бұлай жасасақ ешкім білмей қалады деп ойлап қалды. Менде он, жиырма бала жоқ. Алла берген балаларымды өзім қорғап асыраймын. Ешкімге ренжіткізбеймін", - деген Рахимова оқиғаның қалай болғанын былай баяндайды:
"Тәрбиешісі менің балама күн бермейді. Денесіне жарақат салып, ұрады екен. Демалыс кезінде алып кетіп жүргенде мән бермедім. Өзімнің көзім көрмеген соң, қызым денесін қарайды. Қызым құлағы мен қолы көгергенін айтты. Содан кейін апайына қоңырау шалып, оның қалай пайда болғанын сұрадым. "Білмеймін, балалармен ойнағанда жарақат алған шығар, уайымдамаңыз" деді. Бірақ дәл осындай үлкен көгеру болуы мүмкін емес", - деген ол мұғалімнің нақты жауап бере алмағанын, жалғыз өзінің баласы емес, сондағы көп балалар дәл осындай зардап шегіп жүргенін айтты.
"Баламның көзі көрмеген соң, әріптерді үйреніп жатқанда дұрыс тесе алмағандықтан баланың қолына ине сұғып алатын көрінеді. Көзі көрмеген соң қаламсап ұстай алмайды, жаза алмайды. Сол үшін брайль әліпбиі арқылы ине сияқты затпен тесіп оқиды", - дейді сегіз жастағы Айдарбектің анасы.
"Бұл біріншісі және соңғысы да емес. Денесінде инеден қалған үш із болды. Иненің ізі қолының үстінде қып-қызыл болып көрініп тұрды. Баламнан сұрап едім "айтсам жылайсыз, уайымдамаңызшы" деді. "Әкең жоқ болса да, мен сені қорғай аламын" деп едім "қате жіберген соң, менің қолыма ине тығып алды" деді.
Арнаулы интернат ұжымы тағылған айыпты теріске шығарып отыр.
"Шынымды айтсам соңғы уақытта менде стресс. Балаға сөйлеуге қорқамын. Мамасының маған күш көрсеткенін баланың өзі сезіп отыр. Бала тыңдамайды, бағынбайды. Жай сөйлеуге қорқамын", - деген Айдарбектің апайы Аймерей Бақдәулетқызы оқиғаны өзінше баяндайды.
"Бұл кісінің айтып отырғандарына ешқандай да келісе алмаймын. Қыркүйек айынан бастап жұмысқа кіргенде өз мойнымдағы жауапкершілікті сезініп бардым. Колледжде оқып жүргеннен осы мектепте жұмыс істеймін деген ой болды. Менің сыныбымдағы балалар жаңадан келген. Ал Айдарбек былтырдан бастап оқып жүрген бала. Олар маған үйренсін деп, ең алдымен, оларды өзіме тартып, жүрек жылуымды беру болды", - деген ұстазы баланың денесіндегі көгерген іздер үйінен келгенде болғанын айтты.
"Демалыстан келген баланың оң құлағының көгеріп тұрғанын көрдім. Не болды деп сұрағанымда алтыншы сыныпта оқитын апкем ұрды деді. Мен бұл жағдайға бей-жай қараған жоқпын. Оқу ісі жөніндегі орынбасарға, медбикеге, психологқа айттым. Директорға кірген кезде анасы қызының ұрғанын мойындады", - деп өз уәжін айтты.
"Баланың қолына ине тыққан жоқпын. Қай жағынан алып қарасаңызда бұлай істеу Алланың алдында да үлкен күнә екенін жақсы білемін. Брайль әліппесін меңгерген кезде бала абайсызда қолын қанатып алуы мүмкін", - дейді мұғалім.
Ал оқушының нұсқасы мұғалімнің сөзіне кереғар.
"Әріпті қате тескенім үшін ұрсады. Аймерей апай мені математика сабағында шапалақпен ұрды. Сабағымды қате жазғаным үшін апай қолыма ине тықты", - дейді Айдарбек Рахимов.
