Үйдің шатырына шығып жүр: елорда іргесіндегі тұрғындар WhatsApp-ты әрең қолдануда

«Талапкер ауылындағы ұялы байланыстың станциясы 4 шақырым жерде орналасқан. Байланыстың дұрыс ұстамауы осы себептен болуы мүмкін», - дейді «Қазақтелекомның» өкілі.

фото: tengrinews.kz

Елорда маңындағы Талапкер және Қажымұқан ауылдарының тұрғындары WhatsApp арқылы хат алысу үшін үйдің шатырына шығып жүр. Бұл елді мекендер «Билайн» және «Алтел» компанияларының желісіне қосылған, деп хабарлайды zakon.kz.

Аталған ауылдарда ұялы байланыс қашан дұрысталады? Бұл сұраққа «Хабар 24» арнасындағы брифингке келген «Қазақтелеком» компаниясының өкілі мен «Кар-Тел» компаниясының қызметкері жауап берді.

«Талапкер ауылындағы ұялы байланыстың станциясы көршілес Максимовка елді мекенінде орналасқан. Ал бұл дегеніміз – 4 шақырым болатын арақашықтық. Байланыстың дұрыс ұстамауы осы себептен болуы мүмкін».

«Қазақтелеком» компаниясының жауабы осындай болды. Ал Beeline маркасы қарасты «Кар-Тел» компаниясының өкілі елорданың айналасында бұл оператордың «үздіксіз жақсы жұмыс істеп тұрғанын» алға тартты.