Әлеумет 19.06.2020 сағат 03:45

«Бұл фактор аса маңызды емес»: психолог «әйелдің таяқ жеуі – пәк болмауынан» деген уәжге келіспейді

Себебі, қыздардың пәктігі – басты құндылықтардың тізімінен әлдеқашан жойылып кетіпті. Бұл күнде бұған қатты мән беретін жігіттер аз көрінеді.
«Бұл фактор аса маңызды емес»: психолог «әйелдің таяқ жеуі – пәк болмауынан» деген уәжге келіспейді
фото: aikyn.kz
Бөлісу
Бөлісу
Бөлісу

«Қазақтың бәрі әйелін сабайды деу – қате. Нәзік жандардың таяқ жеуі пәк күйінде тұрмысқа шықпағаннан!». Журналистің жазбасы әлеуметтік желідегі әлеуметтің пайымын екіге жарды. Жеңіс Құспан қыздар өз кінәларын сезгендіктен таяққа көніп жүре береді деп есептейді. Ал психологтар бұл пікір шындыққа жанаспайды дейді. Олардың бұған қатысты уәжі қандай? Бұл туралы Еуразия бірінші арнасы хабарлайды.

Біріккен ұлттар ұйымының мәліметінше, жыл сайын елімізде 400-дей әйел тұрмыстық зорлық салдарынан көз жұмады екен. Қаракөздерімізді көгала қойдай етіп сабап, онысымен қоймай, өлімге қиятын кім дейсіз ғой? Бір дастархан басынан ас ішіп, бір көрпені бөліскен, өле-өлгенше ажырамауға серттескен жан жолдасы. Сонғы уақытта осындай жантүршігерлік деректерден тіптен көз ашпай кеттік. Журналист Жеңіс Құспанов кейде осындай келеңсіз жайттарға әйелдердің өздері кінәлі деп есептейді.

«Менің айтпағым, төсек көріп тұрмысқа шығатын қыздардың қазір үлес салмағының өскені және содан таяқ жейтіндердің де көбейгені. Ойымды нақты жеткізу үшін мынадай бір мысал келтірейін. Айталық, 100 пәк қыз бен 100 «қыз емес» қыз тұрмысқа шықты делік. Бірінші жүздікте көбі отбасының құндылығын сақтайды. Екінші жүздікте айырылысатын да, таяқ жейтіндер де көп болады. Менің айтқым келгені сол ғана», – деді журналист Жеңіс Құспанов.

Алайда, психолог Жаңагүл Тұрманова журналистің пікірімен түбегейлі келіспейтінін айтады. Себебі, қыздардың пәктігі – басты құндылықтардың тізімінен әлдеқашан жойылып кетіпті. Бұл күнде бұған қатты мән беретін жігіттер аз көрінеді. «Ең бастысы, екі жастың арасында сүйіспеншілік болса, жетіп жатыр», - дейді ол.

«Бұл фактор аса маңызды емес. Себеп неде? Өйткені, ол тұрмыс құрғанға дейінгі, отбасын құрғанға дейінгі екі жастың ортасындағы мәселе. Бұл өмірінде жеке тұлғалық мәселеге айналуы мүмкін. Дегенмен, физикалық күш қолданудың бірден-бір себебі, отбасындағы әлеуметтік-психологиялық, экономикалық дағдарыстардың себебі болып отыр», – деді психолог-практик Жаңагүл Тұрманова.

Орташа есеппен, еліміздегі жасөспірім қыздардың етегі 15 жастан бастап түріледі екен. Мұны бізге гинеколог маман айтты.

«Ерте жыныстық қатынастың басталуы 15 және 18 жас аралығы болып тіркеліп отыр. Соңғы 4 жылда 40 мыңнан астам жасөспірім жүктілігі тіркелді. Қабылдауыма келетін қыздардың «Қалай қыздық перденің тұтастығын қалпына келтіреміз?» деген бір-ақ қана өтініші бар. Шамамен, айына 10-12 қыз бала қабылдауымда болады», – дейді гинеколог Әйгерім Сламбекова.

Иә, шалыс естіген жоқсыз. Айына 10 шақты қыз бала пәктік пердесін қалпына келтіреді. Сөйтіп, бір үйдің босағасын алдамшы күйде «адал» болып аттайды-мыс. Бұл бір ғана гинеколог маманның статистикасы. Осы орайда, журналист Жеңіс Құспан facebook-тегі жазбасын көпшілік қате түсінгенін айтады. Сайып келгенде, ол қоғамда әйелін сабамаса отыра алмайтын еркек пен ерінің қадірін кетірген шайпау қатын да баршылық екенін айтқысы келіпті.

Оқи отырыңыз

загрузка...

Соңғы жаңалықтар

Аптасына бір рет ең танымал мақалалардың дайджесін жібереміз

Қызықты материалдар