$ 448.89 € 477.93 ₽ 4.76
Шымкент қаласы көшелерінің бірінде жол бойында тізіліп тұрған дәрігерлердің видеосы тарап, әлеуметтік желілерде қызу талқыланып жатыр. Анықталғандай, коронавирус індетінен қайтыс болғандарды бір минут еске алу үшін дәрігерлерді көшеге шығарып, жол бойына тізіп қойып флешмоб ұйымдастыру Түркістан облыстық туберкулез диспансерінің бас дәрігерінің “идеясы” екен.
Түркістан облысы әкімінің орынбасары Сәкен Қалқаманов фейсбук парақшасында флешмоб туралы айта келіп, бас дәрігердің жауапқа тартылатынын айтқан.
“Шымкенттегі туберкулез диспансерінің бас дәрігері қажетсіз бастама көтеріп, аурухананың бүкіл ұжымын жолға алып шыққан. (дәрігерлер, медбикелер) Қазіргідей қиын жағдайда дәрігерлерді тікелей жұмысынан босату қылмыс десе де болады. Жағдай жан-жақты қаралған соң, ол жауапқа тартылады” деп жазады ол.
Естеріңізге сала кетейік, бүгін коронавирустан қайтыс болғандарды ерекше еске алғысы келген шымкенттік шенеунік дәрігерлерді жол жиегіне тізіп, флешмоб өткізді.
