Әлеумет 14.09.2020 сағат 23:25

«Өте обал болды»: жамағат марқұмның жаназасын тәңіршілдік жолмен шығарған (ВИДЕО)

Алланы да ауызға алмайды. Құдай деп қол жайғанымен, құран оқымайды. «Барлық дұға-тілекті қазақи қара сөзге салып, көкейден айтамыз», - дейді марқұмның жаназасын шығарған Қайрат Рамазан.
«Өте обал болды»: жамағат марқұмның жаназасын тәңіршілдік жолмен шығарған (ВИДЕО)
фото: видеодан скриншот
Бөлісу
Бөлісу
Бөлісу

Әлеуметтік желіге «Тәңіршінің жаназасы» деген атпен таралған видео бірнеше күннен бері қоғамның қызу талқысына түсуде. Онда жаназаға жиналған жамағат марқұмды мұсылмандық емес, тәңіршілдік жолмен ақтық сапарға шығарып салады. Құранның орнына қара сөз арнап, жаназа намазы мүлде оқылмады. Дәстүрлі дінді ұстанушылар бұл шаманизмнің қалдығы десе, Діни басқарма өкілдері тәңіршілдерді еш жерде тіркелмеген дін бұзушылар деп отыр, деп хабарлайды Skifnews.kz ақпарат порталы, КТК телеарнасына сілтеме жасап.

Үш күн бұрын әлеуметтік желіге тараған видео Алматы облысында түсірілген. Жиналған жамағат тәңіршілдік ілімін ұстанатын азаматты ақтық сапарға шығарып салуда. Бірақ, әдеттегідей қайтқан кісіге құран бағышталып, жаназа намазы оқылған жоқ. Алдымен марқұмның қарызы мен парызы сұралды. Одан кейін қара сөзбен жаназасы шығарылып, Құдайға табысталды. Тәңіршілдер ас қайырғанда да алақан жайып, әумин деп айтпайды екен. Барлығы қос қолын кеудесіне қойып, өмін деп дауыс шығарады. Алланы да ауызға алмайды. Құдай деп қол жайғанымен, құран оқымайды. «Барлық дұға-тілекті қазақи қара сөзге салып, көкейден айтамыз», - дейді марқұмның жаназасын шығарған Қайрат Рамазан.

«Біз бата бергенде, тілек айтқанда, лебіз үйіргенде, ниет білдіргенде бет сипамайды емес, сипаймыз. Жамандық болмасын, қайғы қасірет болмасын дегенде бет сипаймыз. Қалған уақытта көкейден шығарамыз. Өмін, өмір деген сөз бар. «Құдайға көңіл бөл» деген мағына білдіреді ол. Біз Құдайға мынаны істе, анда жібер деп айта алмаймыз ғой. Сондықтан өмін деп айтамыз», - дейді «Тәңір ілімі» қоғамдық бірлестігінің бастығы Қайрат Рамазан.

Ал Қазақстан мұсылмандарының діни басқармасы тәңіршілдік ешқандай дінге жатпайтынын айтты. Өйткені, оның ілімі, мәдениеті, тарихы жоқ екен. Сондықтан өздерін тәңіршілміз деп жүргендер «бүйректен сирақ шығарып», ел ішіне іріткі салуда дейді имамдар. Осы орайда, «тәңіршілдік жолмен жаназа шығару – нағыз мәңгүрттік» деді мүфтият өкілдері.

«Өте обал болды, кешегі қайтыс болған кісіге. Адам қайтыс боларда оған кәлиманы айтқызады. Кімнің ақырғы сөзі осы болса, ол жәннатқа кіреді дейді. Оның мирам суы, шешіндіріп жуындыру, оны жуындырды ма, құдай біледі. Кебінге орау, төрт тәкпірлі жаназа оқылуы керек. Біреуі қалып кетсе, тура болмайды. Жерлеу, одан кейін құран оқу. Бұның біреуі де болған жоқ», - дейді ҚМДБ шариғат және пәтуа бөлімінің меңгерушісі Сансызбай Құрбанұлы.

Алматыда «Тәңір ілімі» деп аталатын қоғамдық бірлестік бар. Оған елде 200 мыңға тарта адам мүше көрінеді. Бірақ, олар діни бірлестік ретінде ресми тіркелмеген. Соған қарамастан, тәңіршілдіктің жөн-жоралғысы мен салт-дәстүрін ашық жарнамалай бастады. Ал одан Дін істері комитетінің хабары жоқ сияқты. Себебі, құзырлы мекеме «Тәңіршілер ұйымының жұмысы заңды ма?» деген сауалды созбаққа салып, ақыры жауапсыз қалдырды.

Оқи отырыңыз

загрузка...

Соңғы жаңалықтар

Аптасына бір рет ең танымал мақалалардың дайджесін жібереміз

Қызықты материалдар