$ 447.4 € 477.55 ₽ 4.76
Шымкент полицейлері күзетшімен жанжалдасқан әйел кім екенін анықтады. Желіде ол "прокурордың әйелі" екені айтылған, - деп хабарлайды Tengrinews.kz.
Әлеуметтік желілерде "Қызылорда облысы прокурорының әйелі күзетшіге қоқан-лоқы жасады" деген ақпарат тарап жатыр. Осы дерек бойынша 19 шілдеде Шымкент Полиция департаменті Әл-Фараби аудандық полиция басқармасына "Күзет" қызметкерінен 15 шілдеде сағат 14.00-де ЖШС ғимаратында күзетшілерге тіл тигізіп, қорлаған белгісіз қызды жауапкершілікке тарту туралы арыз түскен.
"Полицейлер әйелдің кім екенін анықтады. Ол - 1984 жылы туған жергілікті тұрғын, бұрын Д.-ға тұрмысқа шыққан, ал ол прокуратура қызметкері емес. Қазір әйел ресми түрде ешкіммен некеде тұрмайды", - деп түсіндірді қалалық Полиция департаментінің баспасөз қызметі өкілі.
Полицейлер Әкімшілік құқық бұзушылық туралы кодекстің 434-бабы бойынша әйелді әкімшілік жауапкершілікке тарту бойынша шаралар қабылдайды.
Еске салайық, бұған дейін Желіде "прокурордың әйелі" мен күзетші арасындағы жанжал видеосы тарағаны хабарланған болатын.
