«Нұр Отанға» КВНщик неге мүше болғысы келмеді

Сөздің шыны керек, қашанда КПСС жиынына ұқсап кететін «Нұр Отанның» бұл бас қосуы қызықтырды. Әрине, танымал әзілкеш Н. Адамбайдың қатысқаны үшін емес. Бас партияның жаңару туралы бастамасы. Н. Адамбай: «Партияның адамдық келбеті болуы тиіс. Қарапайым халықпен байланыс орнатуы керек. Әлеуметтік желілерде белсенділік арттырыңыздар. Менің таңғы асымның суреті  «Нұр Отанның» әлеуметтік желідегі барлық посттарынан көп лайк жинайды» - деді Н.Адамбай. Сондай-ақ, әзілкеш бас партияға мүше болудан сыпайы түрде бас тартты.

«Менен Рақым Ошақбаев неге партияға өтпейсің деп сұрады. Партия туралы пікірін білдіретін сырт адамның болғаны дұрыс шығар деп ойлаймын», - деді продюсер.    

Әлеуметтік желілерде билік партиясының мүшелігінен бас тартқан КВН-шіге ризашылық білдіргендер аз болған жоқ. Себебі әнші, әртіс, КВН-ші, актер,спортшылардың танымалдылыққа ие болғанда бірден партия куәлігіне ие болатыны бізде қалыпты үрдіске айналып кеткен. Бізде Н. Адамбайдың мемлекет басшысы құрған, ұзақ уақыт билікте отырған партияға мүше болмай қойғандығын қаһармандылыққа бағалау ниет жоқ.

2015 жылы сол кездегі «Нұр Отан» партиясы төрағасының бірінші орынбасары Асқар МЫРЗАХМЕТОВ партия қатары миллионға жуықтағанын мәлімдеген болатын. Және қашан да өздерінің жаңа мүшелерімен мақтануды ұмытқан емес. Мәселен, Г. ГОЛОВКИН, И. ИЛЬИН, С. СӘПИЕВ, Қ. НҰРТАС, Д. ҚҰДАЙБЕРГЕН т.с.с. Бұндай тізім жалғаса береді. Қолында билік, үлкен ресурсы бар саяси ұйым неге шоу-бизнес өкілдері мен спортшыларға әуестеніп кетті? Партия жұмысын жандандыру үшін мемлекеттік емес ұйымдардың өкілдері, қоғам қайраткерлері, кезінде саяси өмірге белсене қатысқан, бұл күнде жабылып қалған саяси партиялардың мүшелерін неге шақырмасқа. Әлде, Динара Сәтжандар «Нұр Отанды» шын мәнінде жаңғыртады деп сене ме екен...

Бір кезде белгілі дипломат, саясаткер Болатхан ТАЙЖАН «Нұр Отан» құрамынан ресми мәлімдеме жасап кетіп, оппозициялық партияға қосылған еді. Бұл марқұм Болатхан Тайжан мен билік партиясы позициясының қайшылығы еді. Әңгіме әзілкешіміздің «Нұр Отанға» кірмей қойғанынан басталғасын, өткен күнге шегініс жасадық. Айтпақшы, «Нұр Отаннан» Азат ПЕРУАШЕВ та шығып кеткен. Әуелде «Азаматтық» партиясын «Нұр Отанға» қосып берген алашшыл саясаткер 2011 жылы билікке бәсекелес болып келген «Ақ Жолға» төраға бола қалды емес пе.

Саяси аренада дербес, жоғарыдан емес, ортақ мұраттардан құрылған партиялар ғана «Нұр Отанның» жаңғырып, жарқын болашағына жол ашпай ма? Бас партияның қатарында  Н.ӨНЕРБАЕВ, Б.ТІЛЕУХАН, С.ҚОНАҚБАЕВ, О.ШИШИГИНАЛАР бар емес пе. Әлде, бұл қан жаңарту ма?

Осы тұста Харс ЕНСЕННІҢ: «Мемлекеттен ғалымдар, мұғалімдер, дәрігерлер және  басқа да ой еңбегімен айналысатын мамандар кетсе, яғни, халықтың қаймағы – интеллигенцияның кетуі деген сөз. Ондай елде «бизнесмендер» билікке, плебейлер мен алаяқтар саясаткер, ал базар жағалаған алып-сатарлар мен әртіс,спортшылар депутат болады», -  деген сөзі еске түседі.

Қазір елбасының «Болашаққа бағдар: рухани жаңғыру» мақаласы аясында түрлі шаралар өтіп жатыр. Бас партияның қатарына КВН-ші кіруден бас тартып отырса, шынында да «Нұр Отанға» жаңғыру керек-ақ.