$ 444.22 € 476.38 ₽ 4.82
Мемлекет басшысы «100 нақты қадам» Ұлт жоспарының 15 қадамын тұтастай кәсіби мемлекеттік аппарат құруға арнады. Ұсынылған реформаның негізгі бағыты – халыққа ыңғайлы, тиімді қызмет жасау тәсілін қарастыру. Осы орайда ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Оңтүстік Қазақстан облысы бойынша департаменті «Біздің міндет – халыққа қызмет» деген ұранмен жұмыс жасауда.
Бұл туралы аталмыш департамент басшысының орынбасары – Тәртіптік кеңес төрағасы Берік Бекжанов мәлім етті.
- Әлемде болып жатқан дағдарыстық жағдай біздің елді де алаңдатуда. Сондықтан Қазақстанды дамудың жаңа сатысына шығуына және әлемнің ең дамыған мемлекеттерінің қатарына енуіне мүмкіндік беретін «Нұрлы жол» жаңа экономикалық бағытын жетілдіру жөніндегі «100 нақты қадам» Ұлт жоспары дүниеге келді. Бұл жоспар – жаһандық және ішкі сын-қатерлерге жауап болатын жаңа тарихи жағдайда 30 дамыған елдің құрамына ену бойынша кепіл болып табылады. Реформалар Қазақстанның әрбір азаматының тікелей қатысуын қажет етуіне байланысты Ұлт жоспары деп аталды. Яғни бұл реформалар – тек мемлекеттік аппараттың ғана емес, халықтың ісі. Реформалардың мәні – ұлтты жаңғыртуда. Ұлт жоспарының бірінші – 15 қадамы мемлекеттік қызметшілер корпусын кәсіби және дербес етіп жасауға бағытталған, - дейді Б.Бекжанов.
Оның мәлімдеуінше, қазіргі кезде мемлекеттік қызметшілер үшін «100 нақты қадамның» маңызын жұртшылыққа жеткізу, қоғамның барлық топтары мен институттары арасында беделді топтарды қалыптастыру, мемлекеттік қызметшілерді заманның сұранысына лайық жұмыс жасауға дайындау мәселелерінде ел арасында түсіндіру жұмыстарын жүргізу күн тәртібінің кезек күттірмейтін мәселесіне айналған.
