«Босқындарды қауіпсіз баспанамен қамтамасыз етуге үндейміз» – АҚШ-тың мемлекеттік хатшысы

АҚШ-тың мемлекеттік хатшысы Майк Помпео әлем елдерін Қытайда этникалық қазақтар мен ұйғырлардың қуғындалуын тоқтатуға шақырды, деп хабарлайды Sputniknews.kz.

"Біз адам саудасы мәселелерін, Қазақстанмен шекара маңындағы Қытайдың Шыңжаң лагерлерінде отырған бір миллионнан астам ұйғыр мен этникалық қазақтардың ауыр тағдырын талқыладық,- деді Помпео елордада Қазақстанның сыртқы істер министрі Мұхтар Тілеубердімен өткен келіссөздерден кейін.

Ол АҚШ барлық елді жұмыла әрекет етіп, бұл репрессияны тоқтатуды талап етуге шақыратынын жеткізді.

"Біз Қытайдан қашқан босқындарды қауіпсіз баспанамен қамтамасыз етуге үндейміз", - деді Помпео.
Айта кетсек, АҚШ-тың мемлекеттік хатшысы Майк Помпео екі күндік сапармен Қазақстанға келді.

Помпео мемлекет басшысы Қасым-Жомарт Тоқаевпен және тұңғыш президент, Қауіпсіздік кеңесінің төрағасы Нұрсұлтан Назарбаевпен кездеседі деп жоспарланған.

Мемлекеттік хатшының сапары алғашында жаңа жылдың алғашқы жұмыс күні – 5 қаңтарға жоспарланған еді. Алайда ол АҚШ-тың Ирактағы елшілігінің алдындағы тәртіпсіздікке байланысты Қазақстанға сапарын кейінге қалдырды.