$ 449.3  489.69  4.89

Қазақстанда «үнді» штамының анықталғаны ресми түрде расталды

Бұған дейін Алексей Цой Нұр-Сұлтанда тіркелген коронавирус деректерін тексеру барысында «дельта» немесе «үнді» штамының белгілеріне ұқсас жағдайдың тіркелгенін айтқан болатын.
Фото: ашық дерекөз
Фото: ашық дерекөз

Нұр-Сұлтанда үнді штамы науқастардың 56 пайызында алдын ала расталды. Олардың сынамалары қосымша тексеруге жіберілген. Бұл туралы елорда әкімдігінде айтылды, - деп хабарлайды Tengrinews.kz.

«COVID-19 жұқтыру жағдайлары күрт өскенін және үнді штамын жұқтыру ықтималдығын ескере отырып, Нұр-Сұлтанда қосымша тексеруге 54 науқастан сынама алынды. Оның ішінде пациенттердің 56 пайызынан (30 адам - ескерт.) үнді штамын жұқтыру ықтималдығы анықталды («дельта» штамы). Мутацияның бұл түрі ең жұқпалы және тез таралады», - делінген хабарламада.

Әкімдік мәліметі бойынша, елордада қауіпсіздікті қамтамасыз ету мақсатында қосымша карантин шектеулері енгізіледі. Коронавирустың таралуына жол бермеу шаралары елорда әкімі Алтай Көлгіновтің басшылығымен қалалық штаб отырысында қаралған.

«Мутацияның жаңа түрі ең қауіпті, өйткені өлім қаупі жоғары, адамның иммунитетіне қатты әсер етеді. 54 науқастың 39 пайызынан ұлыбританиялық штамм анықталған. Үнді және ұлыбританиялық штамм жұқтырған пациенттердің 80 пайыздан астамында клиникалық белгі байқалады. 20 науқас ауруханаға жатқызылды, 20 пайызында белгілер жоқ, бір науқас ауруханаға жатқызылды. Көбі дәрігер көмегіне жүгінген. Алты жағдай Ресей, Ауғанстан, Түркістан, екеуі Ақмола облысынан, ШҚО-дан келгендерде тіркелген», - деді Нұр-Сұлтанның бас санитария дәрігері Сархат Бейсенова.

Елорда әкімі Алтай Көлгінов коммуналдық қызметтердің, құрылыс компанияларының басшыларымен, мектептер, балабақшалар, колледждер, СОО, базарлар директоры және басқа да ірі кәсіпорындар өкілдерімен кездесті. Ол адамдар қауіпсіздігін қамтамасыз ету және коронавирустың таралуына жол бермеу мақсатында ұжымдарды вакциналау қажетін еске салды. Ұжымдық иммунитет қалыптасқанда ғана олардың қызметі тоқтатылмайды. 

Бұған дейін Алексей Цой Нұр-Сұлтанда тіркелген коронавирус деректерін тексеру барысында «дельта» немесе үнді штамының белгілеріне ұқсас жағдайдың тіркелгенін айтқан болатын. Министр бұл штамның өзгелерден айтарлықтай ауыр екенін ескертіп, осыған байланысты өңірлерден дәрі-дәрмек пен медициналық көмекке қажетті барлық жабдықпен қамтылуды сұрады. 

Айта кетейік, Қазақстан Республикасының Денсаулық сақтау министрлігінің елде «үнді» штамның болу ықтималдығын анықтағаны хабарланған еді.

Бүгін осы дерекке байланысты ҚР премьер-министрі Асқар Мамин төрағалық еткен Үкімет отырысында елордада карантинді күшейтуді тапсырды.

Сіздің реакцияңыз?
Ұнайды 0
Ұнамайды 0
Күлкілі 0
Ашулы 0

Серіктес жаңалықтары