Қарулы Күштерде әскерлерді қауырт тексеру басталды

Қазақстан Қарулы Күштерінде әскерлерді қауырт тексеру басталды, - деп хабарлайды Tengrinews.kz Қоғаныс инистрлігі мәліметіне сілтеме жасап.

Ведомство мәліметінше, ел Президенті Қасым-Жомарт Тоқаевтың 2021 жылғы 1 қыркүйектегі Қазақстан халқына жолдауында, сондай-ақ 2020 жылғы қарашада Қорғаныс министрлігінің алқасында белгіленген тапсырмаларын іске асыру аясында бірқатар өңірлік қолбасшылықтардың әскери бөлімдері, Десанттық-шабуылдау әскерлері, Әскери-теңіз күштері, Әскери-әуе күштері жауынгерлік әзірлікті тексеру мақсатында дабыл бойынша көтерілген.

Әскерлерді елдің өзге аймақтарына жіберуге бұйрық берілді.

"Әскери қызметшілер әскери техникамен бірге теміржол эшелондарымен, әскери-көлік авиациясымен алыс жерлерге жіберіледі. Бұдан басқа, оқу-жаттығу мақсатында жеке құрамды тасымалдауға азаматтық авиакомпаниялардың ұшақтарын тарту жоспарланған", - делінген хабарламада.

Кейбір запастағы әскери міндеттілерді шақыруды жүзеге асыру үшін жергілікті әскери басқару органдарына нұсқау берілген. Бірнеше азаматқа әскерге шақыру қағаздары табысталды. Оның негізінде әскери бөлімдерді жасақтау үшін олар жинау пункттеріне келуі тиіс болды. Осылайша әскери-оқытылған резервті жұмылдыру мүмкіндіктері тексеріледі.

Белгіленген аудандарға келгеннен кейін әскерлер жауынгерлік оқу-жаттығу тапсырмаларын орындайды. Аталған тапсырмалардың мазмұны оларға қосымша жеткізіледі.

Еске салайық, Тоқаев 1 қыркүйектегі Қазақстан халқына жолдауында Ауғанстандағы жағдайға түсінік бере отырып, әскери-өнеркәсіптік кешен мен әскери доктринаны қайта жүктеуді тапсырған болатын.