Данияр Елеусіновтің шаршы алаңға қашан оралатынын белгілі болды

Қазақстандық боксшы Данияр Елеусінов келесі жекпе-жегін қашан өткізетіні анықталды, деп хабарлайды Skifnews.kz ақпарат порталы.

All Stars Boxing промоушенінің мәліметінше, Данияр Елеусінов ақпанда шаршы алаңға оралады. Бірақ қазақстандық боксшының қарсыласы әлі белгісіз. Промоушеннің Instagram-дағы жазбасында Елеусіновке қарсылас болуы мүмкін үш боксшы көрсетілген. Олардың қатарында Оңтүстік Африка өкілі Тулани Мбенге (21-2, 15 KO), британиялық Крис Конго (15-2, 7 KO) және Венэсуэлла спортшысы Габриэль Маэстре (6-1-1, 5 KO) бар.

Данияр Елеусінов соңғы рет рингке биыл қыркүйекте шығып, Алматыдағы бокс кешінде жұдырықтасқан еді. Ол филиппиндік Джо Нойнайды мерзімінен бұрын 5-раундта ұтып, WBC Peace чемпоны атағын иеленді. Осылайша, Елеусінов кәсіпқой бокстағы 12-жеңісіне қол жеткізген болатын.

33 жастағы Данияр Елеусінов – әуесқой бокстан Олимпиада чемпионы, әлем біріншілігінің жеңімпазы, Азия чемпионатының, Азия ойындарының екі дүркін алтын медаль иегері.