«Айтарым да, дәлелім де жеткілікті»: Жансая Әбдімәлік Бибісара Асаубаевамен болған дау туралы

Қазақстандық шахматшы Жансая Әбдімәлік үш дүркін блиц бойынша әлем чемпионы Бибісара Асаубаевамен арадағы жанжал қайталанған жағдайда сотқа жүгінуге дайын екенін мәлімдеді. Жансая Әбдімәлік бұл туралы Zamandas YouTube-арнасына берген сұхбатында ашық айтты, деп хабарлайды Sn.kz ақпарат порталы.

Әбдімәліктің сөзінше, бұған дейінгі жанжалдар кезінде ол көп дүниені іште сақтағанымен, енді үнсіз қалуды жөн көрмейді. Егер тағы да өзі туралы жалған ақпарат тараса, заңды жолмен жауап беруге бел буған.

«Сол кезде көп нәрсе айтылмай қалды. Негізі айтарым да, дәлелім де жеткілікті. Бірақ енді ондай жағдай қайталанса, мен дайынмын — адвокаттарым бар, бірден сотқа жүгінеміз. Себебі бұл жай ғана пікір емес, нақты жала. Мұны басқаша атау қиын. Кейде тіпті күлкілі көрінеді, бір тәуелділік секілді әсер қалдырады. Мен үш жылдан бері шахматтан алыстасам да, бұл тақырып әлі күнге дейін қозғалады», – деді ол.

Екі шахматшы арасындағы текетірестің тамыры 2021 жылғы ФИДЕ Әлем кубогына барып тіреледі. Сол турнирде Асаубаева тай-брейкте басым түсіп, алғашқы шиеленістің ұшқыны байқалған. Алайда ашық қақтығыс 2022 жылы басталды. Сол кезде Асаубаева федерация басшылығына қатысты даулы мәлімдеме жасап, «үш миллиард» төңірегіндегі әңгімені көтерген еді. Әбдімәлік бұл айыптауларды бірден жоққа шығарып, шындыққа жанаспайтынын мәлімдеді.

2023 жылы Нью-Делиде өткен ФИДЕ Гран-при кезеңінде жағдай тағы ушықты. Жарыс ұйымдастыруына көңілі толмаған Әбдімәлік турнирден бас тартқаннан кейін, Асаубаева оны «эгоизм» үшін сынады. Осыдан кейін екі спортшы арасындағы даулы пікірталас медиа кеңістікте ұзаққа созылған текетіреске айналды.

Қазір бұл тақырып уақытша саябырсығанымен, Әбдімәлік болашақта қандай да бір айыптаулар қайталанса, мәселені құқықтық алаңда шешуге ниетті екенін нақты жеткізді.