«Менің ойыншықтарым»: Криштиану Роналду қымбат автопаркін көрсетті (ФОТО)

Португалиялық атақты футболшы, Сауд Арабиясының «Әл-Наср» клубының шабуылшысы Криштиану Роналдуөзінің жеке гаражындағы сәнді автокөліктер топтамасын көпшілікке таныстырды, деп хабарлайды Sn.kz ақпарат порталы.

41 жастағы футболшы әлеуметтік желідегі парақшасында жеке гаражынан бірнеше сурет жариялады. Кадрларда Роналду ондаған қымбат әрі эксклюзивті көліктің арасында тұр. Жарияланымына ол қысқа ғана «Менің ойыншықтарым» деген жазба қалдырған.

Суреттерде футболшы сәнді суперкарлардың ортасында суретке түскен. Олардың қатарында Роналду отырған Ferrari Monza SP2, сондай-ақ Ferrari Daytona SP3, Ferrari GTC4 Lusso, Bugatti Veyron Grand Sport және Mercedes-AMG One бар.

Басқа ракурстардан оның коллекциясындағы Bugatti Chiron, Bugatti Centodieci, Ferrari LaFerrari және McLaren Senna сияқты сирек кездесетін гиперкарларды да көруге болады.

Португалиялық жұлдыздың автопаркі ондаған миллион доллармен бағаланады. Алайда бұл көліктердің көбі күнделікті жүруге арналмаған. Роналду кейде гаражына арнайы барып, көліктерінің жағдайын тексеріп, тамашалап қайтатынын айтқан.

Футболшының өзі коллекциясында нақты қанша көлік бар екенін де білмейтінін бірнеше рет мойындаған. Әртүрлі деректерге сәйкес, оның иелігінде 40-тан астам автокөлік бар. Соның ішінде ең сүйікті маркаларының бірі – Bugatti.

Роналдуның қымбат көліктерге деген қызығушылығы «Манчестер Юнайтед» пен «Реал Мадрид» сапында өнер көрсеткен жылдары қалыптасқан. Содан бері оның коллекциясы жыл сайын толықтырылып, бүгінде әлемдегі ең сирек әрі ең қымбат көлік үлгілерін қамтиды.

Дегенмен футболшы бұл көліктерді көбіне инвестиция ретінде сатып алатынын айтқан. Оның сөзінше, көптеген автокөлікті мүлде тізгіндемейді және нақты қаншасы бар екенін де есептемейді.

Роналду коллекциясындағы ең танымал көліктер

• Bugatti Centodieci – әлемдегі ең сирек гиперкарлардың бірі. Бар болғаны 10 дана шығарылған. Бағасы шамамен 8–9 миллион доллар. Бұл – Роналду коллекциясының ең құнды көліктерінің бірі.
• Bugatti Chiron және Bugatti Veyron Grand Sport Vitesse – құны бірнеше миллион доллар болатын аңызға айналған гиперкарлар.
• Ferrari LaFerrari, Ferrari Monza SP және Ferrari Daytona SP3 – шектеулі сериямен шығарылған италиялық эксклюзивті модельдер.
• McLaren Senna – аты аңызға айналған бразилиялық автожарысшы Айртон Сеннаның құрметіне шығарылған британдық гиперкар.
• Rolls-Royce Cullinan және Rolls-Royce Phantom – сән-салтанаты мен жайлылығымен ерекшеленетін премиум санаттағы көліктер.
• Lamborghini Aventador – Роналду туған күніне өзіне сыйлық ретінде сатып алған әйгілі италиялық суперкар.

Сонымен қатар оның гаражында арнайы жасалған Mercedes-AMG G63, Bentley, Porsche және басқа да премиум брендтердің көліктері бар.

Айта кетейік, Роналдуның кейбір автокөліктері өзіне сыйлық ретінде берілген. Мәселен, футболшының 35 жасқа толған туған күнінде қалыңдығы Джорджина Родригес оған жаңа Mercedes-AMG G63 көлігін сыйлаған.