Алматыда қариялар Медеудің баспалдағына шығып жарысты (ФОТО)

Алматының Медеу шатқалында «Спорттық Алматы» бағдарламасының аясында XXIХ-шы «Медеу баспалдақ-2017» жүгіру жарысы өтті. Алматы спорт хабының мәліметінше, 500-ден аса адам 100, 200, 300, 400, 500 және 841 баспалдақпен жүгіріп жоғарыға шыққан.

«Рухани жаңғыру» аясында өткен жарысқа 7 жастан бастап барлық әуесқойлар, танымал және кәсіпқой спортшылар, сонымен қатар, отбасылық командалар қатысты. Нәтижесінде, 841 баспалдаққа ерлер арасында бірінші болып шыққан 19 жастағы Әнуар Ерғазы жеңімпаз атанды. Ол барлық баспалдақты 4 минут 20 секундта бағындырған. Ал, тура осы қашықтыққа қыздар арасыда А.Жанбатыр бірінші болып жүгіріп шықты. Оның уақыты – 9 минут 55 секунд.

Танымал спортшылардың қатарында әлемдік рекордтарымен Гиннес кітабына еңген акробатшы Владимир Гашута болды. 70 жастан жоғары жас аралығындағы қатысушыларды озып 100 сатыны бірінші болып бағындырған ол өзінің қырқыншы алтын медаліне ие болды.

«Мен бұл жарысқа жылда қатысамын. 25 жыл бұрын 200 сатыны 37-і секундта бағындырған едім, содан бері ешкім бұл көрсеткішті жаңартпады. Қазір өзім үшін спортпен айналысамын. 100, 200, 300 сатыға қатысып тұрамын. Бұл біздей жастағы кісілерге өте пайдалы іс-шара, себебі өз жасындағы азаматтармен жарысып, керемет атмосфераға бөленесің», - деді Владимир Гашута.

Сонымен қатар, ол 200 баспалдаққа екінші болып шығып күміс жүлдені қанжығасына байлады. Ал, әйелдер арасында 70 жастан жоғары қатысушылардың қатарында 100 сатыға бірінші болып Әуезов ауданының ардагерлері қатарындағы Валентина Вичкуткина келді.

Жеңімпаздар мен жүлдегерлер үздік нәтижелер бойынша, барлық жас ерекшеліктеріне байланысты анықталып медаль мен дипломдар және жарыс ұйымдастырушы мен серіктестері - медициналық компания «Omron» және «Sport Idea» спорт дүкені атынан сыйлықтар табысталды.

Осы мерекелік шараның қатысушылары мен қонақтары «Галантус» группасының жанды дауыста орындалған әндеріне би билеп, арнайы орындарда көптеген ойындар ұйымдастырылды.

Айта кету керек, бұл спорттық жарысқа ең жас және ересек спортшылар (7-12 жас аралығындағы балалар және 70-тен асқандар) баспалдақты бағындыруға мүмкіндік алған болатын. Аталмыш спорттық шара бұқаралық спорттың дамуына бағытталған «Спорттық Алматы» бағдарламасының аясында өткізілді.