Шымкент: «Қайнар» бизнес орталығында жаңа велостанция ашылды

«Shymkent bike» Шымкент қаласының әкімі Ғабидолла Әбдірахымовтың жүзеге асырған жобасы саналады. Қазір шаһарда велосипедшілерге қолайлы болу үшін арнайы жолдар салынып жатыр. Ал «Shymkent bike» жаңа велостанциясы Бәйдібек би даңғылы бойындағы бизнес орталықтың жанынан ашылып отыр. Қазіргі уақытта бұл – «Асар», «Тұран» және салынып жатқан «Shymkent city» қалашығының тұрғындары үшін ең жақын станция.

Бүгінгі таңда Шымкентте ұзын-ырғасы 40 велостанция жұмыс істейді. Және болашақта велостанциялар саны одан да арта түспек. Айта кетерлігі, «Shymkent» ӘКК және «Velocity.kz» қоғамдық қоры «Shymkentbike» жобасы аясында Шымкенттің велоинфрақұрылымын дамыту стратегиясын әзірлеу келісіміне келген болатын. Тәжірибелі мамандар қала орталығына, инфрақұрылымға және қажет жерлерде велостанциялар мен велосипедтерді орнату мүмкіндіктеріне кешенді, жан-жақты талдау жүргізеді және велопрокат жобасын одан әрі дамыту тұжырымдамасын жасайды. Сарапшылар «Велосипедпен жаппай әуестену қала экологиясын жақсартады, көшелердің автокөлік жүктемесін төмендетеді, туристерді тартады және шағын бизнесті ынталандыра отырып, экономикаға оң әсер етеді» деп отыр.

«SN.kz»-ақпарат.