$ 474.83 € 515.38 ₽ 5.5
Парижде өтіп жатқан дәстүрлі "Ролан Гаррос" турнирінің екінші айналымында қазақстандық теннисші Зарина Дияс румын қызы Симона Халептен 0:2 есебімен жеңіліп қалды.
Әлемнің 6-шы ракеткасы саналатын Симона Халептің қазақ теннисшісінен тәжірибесі мол екені сөзсіз. Дегенмен, матчтың бірінші сетінде теннисшілер тең дәрежеде өнер көрсетті, есеп - 6:7 (5:7). Ал, екінші сетте Зарина Дияс қарсыласына тегеурінді қарсылық көрсете алған жоқ. Отандасымыз небәрі екі геймді жеңіп, сетті 2:6 есебімен аяқтады.
Қос теннисші бір-бірімен үш рет кездесіп, үшеуінде де румын қызы жеңіске жеткен. WTA рейтингінде 25 жастағы Халеп 6-шы сатыда тұрса, Зарина Дияс небәрі 90-шы орынға тұрақтаған. Былтыр жерлесіміз үздік отыздықтың қатарынан көрінген болатын.
Енді үшінші айналымда Симона Халеп әлемнің 101-ші ракеткасы жапон Наоми Осакимен кездеседі. Бүгін ол хорват Мирьяна Лючич-Барониды 6:3, 6:3 есебімен жеңген еді.
Тағы бір қазақстандық теннисші қыз Юлия Путинцева екінші айналымда неміс қызы Андреа Петковичпен күш сынасады.
