$ 441.66 € 475.14 ₽ 4.86
75 келіге дейінгі салмақ дәрежесінде өнер көрсететін ирландиялық боксшы Макйл О’Райли бірде-бір жекпе-жек өткізбестен Олимпиада қалашығын тастап кетті. Жарыс фавориттерінің бірі саналып келген оның допинг-сынамасынан тыйым салынған препараттың бары анықталған. Бұл туралы Ирландияның Олимпиадалық кеңесі ресми мәлімдеді.
О’Райли Олимпиада басталмай тұрып өз елінде допингтің бар-жоғын анықтау үшін сынамаларын тапсырған екен. Оның нәтижесі тек 4 тамызда белгілі болып, О’Райли олимпиадалық қалашықтан аластатылған. Оның өзге спортшылармен қарым-қатынас жасауына да тыйым салыныпты.
Айта кетейік, О’Райли жарыстың 1/16 финалын қарсылас болмауы себебінен жекпе-жексіз өткізді. Оның 1/8 финалдағы қарсыласы мексикалық боксшы Мисаэль Родригес болатын. Енді Родригес автоматты түрде ширек финалға жолдама алды.
Олимпиада басталар тұста спорт сарапшылары О’Райлиді осы салмақтағы басты фавориттердің қатарына жатқызған.
