Кеше ғана 3 жылға сотталған Мұратхан Тоқмәдидің үстінен қайта қылмыстық іс қозғалды

Бас прокуратура таратқан ақпаратқа сәйкес, 2007 жылғы 3 қыркүйекте Тараз қалалық сотының үкімімен Мұратхан Тоқмәди ҚР ҚК 101-бабының 1-бөлігі бойынша (1999 жылғы редакцияда) 2004 жылы аң аулау кезінде Ержан Тәтішевтің өліміне абайсызда себеп болған әрекеті үшін 1 жылға сотталды. Бірақ қылмыстық жазадан рақымшылық актісі негізінде босатылған.

"Өз кезегінде жинақталған дәлелдемелердің жиынтығы негізінде (куәлардың, күдікті Мұратхан Тоқмәдидің жауаптары, сараптама қорытындысы және т.б.) шын мәнінде Ержан Тәтішевтің өлімі абайсызда қарудың атылуынан емес, қасақана әрекеттің салдарынан орын алғаны дәлелденді. Осыған орай ағымдағы жылғы 25 қазанда ҚР Қылмыстық-процестік кодекстің 502, 503-баптары незінде процессуалдық прокурор Мұратхан Тоқмәдиге қатысты үкімді жоюға негіз бар деген қорытынды мен қылмыстық істі жаңадан ашылған мән-жайларға қатысты қозғау туралы өтінішхатты Жамбыл облыстық сотына жолдады", — делінген хабарламада. 

Еске сала кетсек, КТК арнасында шыққан фильмде Мұратхан Тоқмади мәлімдеме жасап, "Тұран Әлем банкі" АҚ басқарма төрағасы Ержан Тәтішевті өлтіргенін мойындайды. Ол Тәтішевті қашып жүрген банкир Мұхтар Әбілязовтың тапсырысымен өлтіргенін, ал 2004 жылы өзінің досын өлтіргені үшін кінәсіз деп танылу үшін тергеуді сатып алғанын айтады.

"КазСтройСтекло" зауытының басшысы 51 жастағы Мұратхан Тоқмади 12 маусым Алматыда арнайы операция кезінде "ірі көлемдегі мүлікті иелену мақсатымен бопсалады" деген күдікпен ұсталды. Ресми мәлімет бойынша, Тоқмади 2005 жылы аты-жөні анықталмаған адамдармен сөз байласып, "Семрюжком" мен "КазСтройСтекло" компанияларының құрылтайшысына күш көрсету арқылы бопса жасап, аталған кәсіпорындардағы жарғылық капиталының үлесін иеленген. 

Сондай-ақ оған қылмыстық кодекстің 87-бабының 4-тармағы, яғни қаруды, оқ-дәрiлердi, жарылғыш заттарды және жарылыс құрылғыларын заңсыз иемдену, беру, өткiзу, сақтау, тасымалдау немесе алып жүру бойынша айып тағылды.

Мұратхан Тоқмади тергеумен кінәсін мойындау туралы келісімге келген. Сот шешімімен кәсіпкер үш жылға сотталды.