Әскерилер мен ішкі істер қызметкерлерінің жанжалы желілерде тарап кетті (ВИДЕО)

Өзбекстанның Карши ауданында әскерилер мен ішкі істер қызметкерлері жанжалдасып қалғаны туралы видео әлеуметтік желілерге тарап кетті, деп хабарлайды Орталық Азия жаңалықтар қызметі.

Uztime арнасының YouTube платформасына жүктеген видео Карши ауданының «Агора» базары маңындағы автотұрақта түсірілген.

«Дарё» сайтының хабарлауынша, өздерін Оңтүстік-Шығыс арнайы әскери округының офицерлеріміз деп таныстырғандар ішкі істер бөлімінің қызметкерлеріне «қысым жасаған».

Видеода әскерилер милиция қызметкеріне «арнайы формада қалада жүруге болмайды» деп ескерткен.

Милиция қызметкері оған: «Менің өз бастығым бар. Соларға жаз. Мен заң бұзсам, қызметтік тексеру болады. Тексеруді сендер жүргізбейсіңдер», - деді.

Әзірге Ішкі істер министрлігі де, Қорғаныс министрлігі де бұл видеоға қатысты мәлімдеме жасамады.