«Атамбаевқа шабуыл жасауға бұйрық бермегеніме өкінемін»: Қырғызстанның МҰҚК төрағасы отставкаға кетуге дайын

Қырғызстанның мемлекеттік ұлттық қауіпсіздік комитетінің төрағасы Орозбек Опумбаев республикадағы жағдайдың ушығуына байланысты отставкаға кетуге дайын екенін мәлімдеді, деп хабарлайды РИА Новости. 

«Таңертең Қауіпсіздік кеңесінің отырысында мен президентке отставкаға кеткім келетінін хабарладым. Оған менің де кінәм бар. 3500 сарбаздың барлығын жұмылдыру керек еді, олай болған жоқ», - деді Опумбаев. Бұл туралы ол парламенттің кезектен тыс отырысында депутаттар алдында есеп беру барысында мәлімдеді.  

Ұлттық қауіпсіздік комитетінің бастығы Орозбек Опумбаев депутаттар алдында есеп бере отырып, Алмазбек Атамбаевты ұстау барысында қоластындағы адамдарға оқ атпауға бұйрық бергеніне өкінетінін айтты. 

«Атамбаевтың қарусыз адамдарға шабуыл жасайтынын ешкім күткен жоқ. Шынымды айтсам, оған шабуыл жасауға бұйрық бермегеніме өкінемін», - дейді Орозбек Опумбаев.