Тамақ жеуге болатын «революциялық маска» 350-1200 теңге тұрады

Тель-Авив өнертапқыштары коронавирустан қорғайтын және тамақ жегенде шешпеуге болатын маска шығарды. Олар пандемия кезінде де тамақтану орындарына еш қауіпсіз бара беруге болатынына сенімді, деп хабарлайды Tengrinews.kz, Reuters-ке сілтеме жасап.

Avtipus Patents and Invention компаниясының вице-президенті Асаф Гителис «революциялық масканың» таныстырылымында өнім мейрамхана, бар және дәмханалардың жұмысына қатысты мемлекеттің шектеулеріне әсер ете алады деп үміттенетінін жеткізді.

«Масканы қолыңызды тигізбей, механикалық жолмен немесе автоматты түрде ашуға болады: шанышқыны бетіңізге жақындатыңыз және ол бірден ашылады. Енді қоғамдық орындарда сүйікті тағамыңызды жеуге ештеңе кедергі келтірмейді», - деді Гителис.

Оның айтуынша, маскаға патент алуға өтініш берілген. Бірнеше айдан кейін көптеп шығару жоспарланған. Компания вице-президенті масканың бағасы 85 центтен 2,85 долларға дейін (350-1200 теңге аралығында) болатынын атап өтті.