$ 448.15  483.46  4.86

Тағы бірнеше елден коронавирустың мутацияланған түрі анықталды

Коронавирустың жаңа түрі желтоқсан айының ортасында Ұлыбританияда тарай бастаған B117 штамына ұқсас, бірақ оның антиденелерге төзімділігі жоғары.
Фото: ria.ru
Фото: ria.ru

Коронавирустың B1525 деп аталған жаңа түрі Ұлыбритания мен АҚШ секілді бірнеше елден анықталып отыр. Бұл туралы Эдинбург университетінің зерттеушілеріне сілтей отырып, Guardian басылымы хабарлады, деп жазады Азаттық

Жаңа штамм алғаш рет желтоқсан айында Ұлыбритания мен Нигерияда тіркелген.

Ғалымдардың сөзінше, коронавирустың жаңа түрі желтоқсан айының ортасында Ұлыбританияда тарай бастаған B117 штамына ұқсас, бірақ оның антиденелерге төзімділігі жоғары. Вирустың жаңа нұсқасымен Ұлыбританияда кемі 32 адам, Данияда – 35, Нигерияда – 12 адам тіркелген. АҚШ, Франция, Гана, Австралия, Канада, Иордания және Испания елдерінде бірнеше адамнан анықталған.

Коронавирустың мутациялары былтырғы күзден бастап үлкен мәселеге айналып отыр. Ғалымдар сол кезде Ұлыбританияда SARS-CoV-2 вирусының жұқпалығы жоғарырақ нұсқасы анықталғанын хабарлаған.

Содан кейін ОАР-да тағы бір штамм пайда болды. Сынақ AstraZeneca және Pfizer вакциналарының жаңа штамға қарсы тиімділігі төмен екенін көрсеткен. Осыдан соң ОАР AstraZeneca вакцинасын өндіретін үндістандық компанияға жүгініп, 1 миллион дозаны қайтарып алуды сұраған деп жазды Economic Times басылымы шенеуніктерге сілтей отырып.

Күнделік тіркелетін Covid науқастарының саны бесінші апта қатарынан төмендеп келеді. Бұл туралы Дүниежүзілік денсаулық сақтау ұйымының бас директоры Тедрос Гебрейесус мәлімдеді. Жыл басында аптасына бес миллион адам тіркеліп жатса, қазір бұл көрсеткіш екі миллионға дейін төмендеген.

Джонс Хопкинс университетінің мәліметінше, індет басталғалы әлемде 109 миллионнан астам адам коронавируспен тіркелген. Оның 2,4 миллионнан астамы көз жұмған.

Сіздің реакцияңыз?
Ұнайды 0
Ұнамайды 0
Күлкілі 0
Ашулы 0

Серіктес жаңалықтары