Кеше «Нұр Отан» партиясының Орталық аппаратында партияның Саяси талдау және стратегиялық зерттеулер орталығының тұсаукесер рәсімі болып өтті. Елбасының тікелей тапсырмасымен ашылып отырған орталық алдағы уақытта мемлекетіміздің жаңа саяси, стратегиялық бағыт-бағдарын жүзеге асыруға және партия қызметтеріне талдаулар жүргізіп, дұрыс шешімдердің қабылдануына ықпалын тигізетін болады. Дер кезінде құрылған құрылымды жұртшылыққа таныстыру рәсіміне Сенат және Мәжіліс депутаттары, белгілі қоғам қайраткерлері, саясаттанушылар, халықаралық сарапшылар, жоғары оқу орындарының басшылары және ғалымдар қатысты.
Іс-шараны «Нұр Отан» партиясы Төрағасының бірінші орынбасары Мұхтар Құл-Мұхаммед ашып, жүргізіп отырды. Сөз басында Мұхтар Абрарұлы жаңа талдау орталығының озық әлемдік тәжірибеге сүйеніп құрылғанын айтты. Соның барысында Еуропа мен Азиядағы және АҚШ пен Ресейдегі осындай орталықтардың құрылу тарихы зерттеліп, жұмыстары зерделенген. Өз сөзінде партия Төрағасының бірінші орынбасары: «Белгілі «ой фабрикаларын» жүзеге асырудың әлемдік тәжірибесін жан-жақты зерттеу негізінде бүгін жаңа орталық өз жұмысын бастап отыр. Осыған орай біз әлемнің дамыған елдеріндегі ең жетекші партиялардың аналитикалық құрылымдарының жұмысын сараладық. Бұл орталық Елбасымыз ұсынған қалыптасқан мемлекеттің жаңа саяси, стратегиялық бағытын жүзеге асыруды талдамалық жағынан қамтамасыз ететін болады. Өздеріңізге белгілі, 2016 жылдың 6 мамырында өткен «Нұр Отан» партиясы саяси кеңесінің отырысында Нұрсұлтан Назарбаев жетекші саяси күш ретінде партияның идеялар генераторы болуы керектігін, ол үшін өзіндік мықты талдау орталығын құру қажеттігін атап өтті. Бүгінде біз Елбасымыздың тапсырмасын сәтті жүзеге асырдық деп мақтанышпен айта аламыз. Белгілі сарапшылар мен эксперттердің арқасында біздің орталық тез уақытта танымалдылыққа ие болады деп сенеміз. Қазірдің өзінде орталықтың өз халықаралық сарапшылар кеңесі бар. Сондай-ақ онда білікті жас мамандар жұмыс істейтін болады. Мамандарды қызметке алу барысында бір орынға 10-15 адамнан, тіпті кей лауазымдарға 50 үміткерден болғаны көңіл қуантады. Олардың басым бөлігі «Болашақ» бағдарламасы бойынша батыс елдеріндегі алдыңғы қатарлы жоғары оқу орындарында білім алған жастар» деді.
Сонымен қатар Мұхтар Құл-Мұхаммед жаңа орталықтың директоры болып еліміздегі бірқатар саяси науқанға тәуелсіз сарапшы қатысқан білікті маман, әлеуметтік ғылымдар кандидаты Юлия Кучинскаяның тағайындалғанын хабарлады.
Өз кезегінде Юлия Владимировна орталықтың еліміздің кемел келешегі үшін маңызы жоғары екенін атап өтті. Оның айтуынша, бүгінде әлем бойынша 6500-ден астам осындай талдау алаңы бар екен. «Өздерінің стратегияларын жасап, әлеуметтік-экономикалық іс-әрекеттерін жетілдіруде, сондай-ақ саяси шешімдер қабылдауда саяси партиялар талдау материалдары мен зерттеу топтарының болжамдарына сүйенеді. Енді бізде де АҚШ, Ұлыбритания, Ресей, Қытай, Жапония және Еуропалық Одақтың жетекші саяси партиялары секілді өзіндік «ой фабрикамыз» бар» дейді Юлия Кучинская.
Сонымен қатар Орталық директоры: «Стратегиялық зерттеулер орталығының басым бағыттары: жаһандық үдерістегі Қазақстан, жаңа шынайылықтағы ақылды экономика, ақпараттық қауіпсіздік, мемлекеттік және саяси бағдарламалардың нәтижелілігін бақылау, партиялық жүйенің дамуы, қоғамдық пікірге бақылау және болжау жасау. Қазірдің өзінде орталықта 30 талдаушы мен сарапшы жұмыс істейді. Олардың арасында ғылым докторлары мен кандидаттары, Ph.D докторанттары мен магистранттары, «Болашақ» бағдарламасы мен Назарбаев университетінің түлектері бар. Сарапшылық қауымдастықпен бірлескен жұмыс шеңберінде орталық Sarap Time пікір-сайыс және КИПР талдау клубтарымен өзара қарым-қатынас жасайды. Орталық жанында «Зерде» сараптама клубы бар. Бұл – еліміздің әлеуметтік-экономикалық және саяси дамуына қатысты өзекті сұрақтар бойынша ғалымдар мен сарапшылардың пікір-талас алаңы. Шетел мамандарының тәжірибелерін тарту үшін орталық жанында халықаралық сараптамалық кеңес құрылған. Кеңес құрамында ірі сараптамалық «ой трестері» мен әлем университеттерінің, атап айтқанда, АҚШ, Ұлыбритания, Нидерланды, Ресей, Израиль, Сингапур, Жапония және Оңтүстік Кореядан өкілдер бар» деді.
Аталған іс-шараға қатысқан Парламент Сенатының депутаты Ақан Бижанов «Нұр Отан» партиясы жанынан осындай стратегиялық зерттеу орталығының ашылуы уақыт талабы екенін жеткізді. «Өйткені қазіргі таңдағы әлемдік экономика мен саясаттағы болып жатқан оқиғалар және біздің еліміздегі жағдайлар ғылыми сараптауды, болжауды, сондай-ақ соған қатысты тиісті тетіктерді іске қосуды қажет етеді. Бүгінде «Нұр Отан» – еліміздің бас партиясы. Бұл өз кезегінде бізге мемлекеттік бағдарламалық құжаттардағы басымдықтарды жүзеге асыру кезінде үлкен жауапкершілік жүктейді. Бұл ретте, біз әлемдегі көптеген саяси партиялардың жетекші ғылыми орталықтарының тәжірибелеріне сүйеніп жұмыс істеуіміз керек. Соның ішінде Қытай сияқты алпауыт елдегі Комунистік партияның тәжірибесінен көп үлгі алуға болады. АҚШ, Ресей сияқты елдермен де тығыз байланыс орнатуымыз керек» деген сенатор орталықта қазіргі заманғы отандық және шетелдік оқу орындарында білім алған, тәжірибеден өткен жастардың жұмыс істейтіні көңіл қуантатынын айтты. Сондай-ақ ол осы салада ұзақ жылдар бойы жұмыс істеген аға буын өкілдерінің де тәжірибесі назардан тыс қалмайтынын тілге тиек етті.
Осы ретте Мұхтар Құл-Мұхаммед орталықтың Республика Парламентімен бірлесіп жұмыс істейтінін айтып өтті. Соның ішінде қос Палатадағы ғылым саласын қатар алып жүрген депутат мырзалармен ерекше байланыс орнатылатынын да жеткізді. Өз кезегінде Парламент Мәжілісінің депутаты, Орталық бақылау кеңесінің мүшесі Серік Сейдуманов та бұл бастаманы қолдайтынын білдірді.
«Бүгінде әлемдегі талдау орталықтарының жартысынан көбі АҚШ пен Еуропа елдерінде. АҚШ-тың бұрынғы президенттерінің құрметіне қорлар мен кітапханалар құрудың мақсаты – тек жаңа басылымдар мен тарихи құжаттарды сақтау емес, бірінші кезекте осындай жаңа талдау орталық құру. Бұл адамзат өркениетін дамудың жаңа сатысына бағыттауға мүмкіндік береді. Қуатты талдау орталығы тек ел ішіндегі ғана емес, халықаралық масштабтағы саяси жағдайларды реттеуге мүмкіндік береді» деген С.Сейдуманов орталықтың іске қосылуына үлкен үлес қосқан Мұхтар Абрарұлына зор алғысын білдірді.
Ал Ресей халықаралық істері кеңесінің сарапшысы, РҒА Шығыстану институтының ғылыми қызметкері, Орталық Азия және Ауғанстан өңірлері бойынша сарапшы Никита Мендкович қазіргі таңда әлем тап болып отырған экономикалық және қауіпсіздік мәселелеріне қатысты келеңсіздіктердің алдын алуда саяси талдау және стратегиялық зерттеулер орталығының атқаратын рөлі айрықша екенін айтты. Сондай-ақ ол Қазақстан мен Ресей арасындағы сараптамалық диалогтың дамуына бұл орталық айтарлықтай септігін тигізетініне сенім білдірді.
Ресейлік маманның қауіпсіздікке қатысты сөзін құптаған Парламент Сенатының депутаты Мұрат Бахтиярұлы еліміздегі әлеуметтік мәселелердің оң шешілуінде бұл орталықтың үлесі көп болатынына назар аударды. Депутаттың сөзіне қарағанда, еліміздің батыс өңірлеріндегі діни мәселелердің алдын алу үшін осындай орталықтардың жұмысын жандандыру керек. «Бұл ретте аға ұрпақ қашанда өз тәжірибелерімен бөлісіп, көмек қолын созуға дайын» деді М.Бахтиярұлы.
Орталықтың дер кезінде құрылып, жұмысын бастап отырғанын айтқан Л.Гумилев атындағы Еуразия ұлттық университетінің ректоры Ерлан Сыдықов: «Қоғамда лидер атану үшін әр партияда біріншіден, мықты бастауыш партия ұйымдары, екіншіден, бұқаралық ақпарат құралдары, үшіншіден, талдау орталықтары болуы керек. Осы уақытта ғана келешегімізді дұрыс бағдарлай аламыз. Сондықтан бүгінгі орталық дер кезінде ашылып отыр. Сондай-ақ бұл орталықтың тағы бір басымдығы, оның Елбасы, партия лидері Нұрсұлтан Назарбаевтың тікелей тапсырмасымен ашылуы. Меніңше, алдағы уақытта мұндай орталықтар бірнеше бағытта құрылып, ауқымын кеңейтуі керек. Оған еліміздегі жоғары оқу орындарының, соның ішінде Еуразия ұлттық университетінің білікті профессор ғалымдары өз тәжірибелері арқылы қолдау көрсетуге дайын» деген Е.Сыдықов Елбасының бұл тапсырмасынан үлкен көрегендікті байқауға болатынын айтты.
«Алдымызда «100 нақты қадам» – Ұлт жоспарына сәйкес көптеген міндеттер тұр. Соларды жүзеге асыру барысында жұмыстарды жүйелі жүргізуде осындай орталықтардың көмегі зор болмақ. Алдағы уақытта еліміздің президенттік-парламенттік жүйеге көшуі жоспарланғаны да белгілі. Сол кезде партиялар арасындағы бәсекелестіктің күшейетіні түсінікті. Соған қазірден әзір болу үшін «Нұр Отан» партиясы тарапынан осындай қадамдардың жасалуы маңызды» дейді ЕҰУ ректоры.
Өз кезегінде «Тұран» университетінің ректоры, Жоғары оқу орындары ассоцияциясының президенті Рахман Алшанов та орталықтың еліміздің жүйелі дамуында маңызды рөл атқаратынын атап өтті.
Сондай-ақ жиын барысында Қазақстан Республикасы Президенті жанындағы Қазақстан стратегиялық зерттеулер институтының директоры Ерлан Қарин де аталған іс-шараға қатысты өз пікірін білдірді. Ол өз сөзінде: «Соңғы Парламент сайлауының өткеніне көп уақыт бола қойған жоқ. Содан бері «Нұр Отан» партиясының қоғамдық-саяси деңгейдегі белсенділігінің артқанын байқаймыз. Бұл әрине, көңіл қуантады. Себебі, партия тек сайлауалды науқан кезінде ғана емес, барлық уақытта осылай сайлаушылармен тығыз байланыста жұмыс істеуі тиіс» деді.
Ал «Самұрық-Қазына» ұлттық әл-ауқат қоры жанындағы Әлеуметтік серіктестік орталығының директоры Нұрлан Ерімбетов өз тәжірибесімен бөлісіп, осындай орталықтардың медиаторлық қабілетке ие болуы керектігін айтты. Одан бөлек, қазіргі ақпараттық ағынға белгілі бір деңгейде бақылау орнату керектігіне де назар аударып: «Еліміздегі ақпараттық қауіпсіздік деңгейін арттыруымыз керек. Қазіргі ақпараттарға қарасақ, Қазақстанда қылмыс көбейіп, қанды оқиғалар артқандай әсер аламыз. Ал шын мәнінде, олай емес. Тіпті КСРО кезіндегімен салыстырсақ, бүгінде қылмысты оқиғалар бірнеше есеге азайған. Алдағы уақытта орталықтың осы мәселені де ескереді деп ойлаймын» деді.
Осы ретте партия Төрағасының бірінші орынбасары медиатор мәселесінің өте орынды көтерілгеніне назар аударды. Себебі, кейбір адамдар қанша жерден білікті, кәсіби деңгейі жоғары болғанымен, ораторлық қабілеті төмен болуы мүмкін. Сондықтан кез келген басшылық қызметке қабылдамастан бұрын ол үміткердің қоғамдық процестердің ортасында жүріп, сол оқиғаны халыққа түсіндіру барысында біліктілік таныта білетін маман екеніне көз жеткізу керектігін айтты.
Жаңа орталықтың тұсаукесер рәсіміне қатысқан белгілі қоғам қайраткері, «Атамекен» ұлттық кәсіпкерлер палатасы төрағасының орынбасары Мұрат Әбенов дәл қазіргі кезде осындай талдау орталығы аса қажет құрылым екеніне тоқталып: «Кейде кейбір әлеуметтік жағдайларға қатысты нақты деректер жетіспей жатады. Сондай сәттерде мемлекеттік органдардың ұсынған ақпараттарына сүйеніп шешімдер қабылданады. Соның салдарынан қателіктерге бой беріп жатамыз. Осы ретте алдын ала жоспарлау, қоғамның қалай қабылдайтыны туралы болжау жасау жұмысты жеңілдеткен болар еді» деді.
Шара соңында Мұхтар Құл-Мұхаммед «Нұр Отан» партиясының саяси талдау және стратегиялық зерттеулер орталығының бірқатар білікті мамандарымен таныстырып өтті. Олардың арасында орталық директорының орынбасары, тарих ғылымдарының кандидаты Серік Қожкенов сынды тәжірибелі мамандармен қатар, Ұлыбритания, Қытай, Франция, Германия және Ресей мемлекеттерінің алдыңғы қатарлы оқу орындарында білім алған талантты жастар да бар. Осындай білікті мамандардан жасақталған орталық алдағы уақытта еліміздің гүлденіп, көркеюіне өз септігін тигізетін болады.
Жиын барысында жаңа орталықтың жұмысы жөнінде арнайы бейнеролик көрсетілгенін айта кетейік. Сондай-ақ партия Төрағасының бірінші орынбасары барша қатысушыларды ел мүддесі жолында бірлесіп жұмыс істеуге шақырды.