Шымкенттегі ең дәмді палауды 13 жастағы жеткіншек пісірді (ФОТО)

Қазақстандағы Өзбекстан жылы аясында ұйымдастырылған "Қазақстан палауы" атты фестивальге тек қана Шымкент емес, алыс-жақын аудандардың да кіл мықты аспаздары бақ сынады. Отыздан астам қатысушы таңертең қазандарын қаланың шет жағында орналасқан тойханаға көтеріп келіп, додада сынасуға білек сыбана кірісіп кетті.

Ұйымдастырушылардың айтуынша, дәстүрлі палау шарасына қатысушылар тарапы биыл ерекше қызығушылықтарын танытыпты. Ең ерекшесі, биылғы сында мектеп оқушысынан бастап 70 жастағы қарияға дейін аспаздық шеберлігін танытқан. Бағын сынаушы барлық аспаз ер азаматтар.

"Қазақстан палауы" шарасында бақ сынаған аспаздар палаудың 18 түрін дайындады. Шараға келген кез келген жан астан ауыз тиіп, тіпті өздерімен бірге алып кетуіне мүмкіндік болды. Бәрі тегін. Ұйымдастырушылар бұл шара халық үшін жасалынып отырғандықтан елдің ризашылығы бірінші кезекте дегенді алға тартты.

Фестивальде көпшілікке ұсынылған астың дәмділігін анықтау үшін арнайы комиссия да құрылған. Бес адамнан тұратын бұл комиссияның арасында кәсіби аспаздар да бар. Сонымен, фестиваль қорытындысы бойынша 13 жастағы шымкенттік оқушы Бабамұрат Абдурахманов әзірлеген палау ең үздік деп танылды.

Фото: Nur.kz