Сәтпаевта емізулі баласы бар отбасы Сирияға соғысуға кетпек болған

Сәтпаев қаласында емізулі баласы бар жас отбасы мен жергілікті екі тұрғын терроризмді насихаттағаны және шекараны заңсыз кескені үшін сотталды деп хабарлайды Informburo.kz Қарағанды облыстық прокуратурасына сілтеме жасап. Олар сондай-ақ, лаңкестік топ құрамына енуді жоспарлаған.

Прокурорлардың айтуынша, биыл наурыз айында У.Тұрсынбаев пен Б.Сағатова есімді ерлі-зайыптылар емізулі баласын алып, Бішкекке өтіп кеткен. Қырғыз астанасынан олар Түркия арқылы Сирияға кетпек болыпты.

"Тұрсынбаев ДАИШ лаңкестік ұйымының қатарына еніп, Сирияда соғыспақ болған", - делінген прокуратураның баспасөз қызметінде.

Сәтпаев қалалық соты лаңкестік топ құрамына енуді көздегені үшін және шекараны заңсыз кесіп, терроризмді насихаттағаны үшін Тұрсынбаевты 6 жылға бас бостандығынан айырды. Ал, оның әйелі Сағатова 6 айға шартты жазаға сотталды.Үкім 2016 жылдың қыркүйегінде шығарылған.

Дәл осы Сәтпаев қаласында 2015 жылдың желтоқсан айында да терроризмді насихаттағаны үшін М.Жапаров есімді жергілікті тұрғын 6 жыл 5 айға сотталса, биыл 9 қыркүйекте өзге тұрғын 5 жылға қамалды. Ол әлеуметтік желі арқылы жастарды "қасиетті соғысқа" тартқан.