«Сайкал». Ерке Есмаханның басы дауға қалды

Ерке Есмаханның шығармашылығынан шикілік шықты. Оның репертуарындағы хит қырғыз елінің әні екенін желідегі жұрт байқап қойған, деп хабарлайды Экспресс К.

Ерке Есмаханның орындауындағы "Еркелей берем" әні плагиат болып шықты. Ол қырғыз әншісі Сайкал Садыбакасованың авторлық туындысын өз репертуарына қосып алған. Аталмыш хитті көрші елдің өнерпазы 2020-ның басында жарыққа шығарса, Ерке сол жылдың соңында тыңдарманға ұсынған. Осы уақытқа дейін тек қазақша баламасын тыңдаған көпшілік, қырғыз әншісінің орындауындағы тұпнұсқасын жоғары бағалап отыр.

"Еркелеп жүре бер, Сайкал, бақытты бол. Авторлық әнің керемет. Қазақ елінен сәлем. Шымкенттен", "Сайкал да, Ерке де әдемі айтады. Өлең керемет. Бір тыңдағаннан ғашық болып қалдым. Қазақ-қырғыз бір туған. Жарайсың", — деп қырғыз әншісіне пікір жазылған.

Ерке Есмахан көрші елдің көшірме әнін қазақшаға аударып, ақын Қайнар Алагөзовке мәтінін жаздырған және жеке клип те түсіріліп үлгерген. Бүгінде аталмыш бейнебаян 5 миллионға жуық қаралым жинапты.