Қостанай облысының тұрғындары эвакуацияланды

Қостанай облысы Железнодорожное ауылының тұрғындары тасқын судан эвакуацияланды, деп хабарлайды төтенше жағдайлар министрлігі.

Жергілікті атқарушы органдар мен ТЖД қызметкерлері Железнодорожное ауылындағы екі пәтерлі алты үйге кірген еріген қар суының салдарын әлі жойып жатыр. Қар тез ерігендіктен Тімтуір өзені арнасынан асып кеткен.
Салдарынан 30-дан астам адам эвакуацияланды. Қазіргі уақытта олар туыстарының үйіне орналастырылды. Үй жануарлары қауіпсіз жерге шығарылды.

"Жедел жұмыстарға жергілікті атқарушы органдар мен құтқару бөлімшелерінен 15 бірлік техника және 30 адам жұмылдырылды. Қатты ағынға төтеп бере алмай жатқан құбырларға қар суы толассыз құйылып жатыр. Қазіргі күні сол суды сору жұмыстары жүріп жатыр", - деп мәлімдеді министрлік.

Ведомство мәліметінше, жағдай тұрақты, өзенде су көтерілген жоқ. Тәулік бойы кезекшілік және мониторинг ұйымдастырылған.

Дереккөз: Спутник Қазақстан