Жетісу облысында қатты жауын екі бірдей көпірді шайып кетті

Жетісу облысында қатты жауын көпірді шайып кетті, деп хабарлайды Жетісу облысы Төтенше жағдайлар департаментінің баспасөз қызметі.

9 шілде сағат 19:41-де Жетісу облысы Кербұлақ ауданында облыстық маңызы бар «Қарашоқы – Сарыөзек» автожолында жауын-шашынның мол түсуі салдарынан ағын пайда болды. Ол табиғи қуыс бойынша жоғарыда аталған автожолға тіреліп, алдын ала ақпарат бойынша 2 жерде орнатылған құбырлы өткелдерді шайған (диаметрі 0,75 құбырлы өткелдер су көлеміне төтеп бере алмаған), - деп жазылған хабарламада.

Оқиғадан зардап шеккендер мен қаза тапқандар жоқ. Қазір жаңбыр тоқтап, су деңгейі төмендеді.

Оқиға орнында жергілікті атқарушы органдардың, полицияның, төтенше жағдайлар органдарының күштері мен құралдары жұмыс атқарып жатыр. Айналма жол бар. Полиция қызметкерлері қауіпсіздік бекеттерін қойды.