Астанада Орталық Азия елдерінің қатысуымен әкелер форумы өтті

Астанада «Ұрпақ тәрбиесі – ұлт болашағы» тақырыбында  VIII Республикалық әкелер форумы өтті, деп хабарлайды Skifnews.kz ақпарат порталы.

Форумға Өзбекстан, Қырғызстан, Тәжікстан, Түрікменстан елдерінің өкілдері, ҚР Президентінің жанындағы Әйелдер істері және отбасылық-демографиялық саясат жөніндегі ұлттық комиссияның мүшелері, Парламент депутаттары, жергілікті атқарушы органдардың, ҮЕҰ мен БАҚ өкілдері, сондай-ақ «Әкелер одағы» РҚБ делегаттары қатысты.

Форумның мақсаты әкелер институтын дамыту, отбасылық құндылықтар және өскелең ұрпақты тәрбиелеу саласында жаңа тәсілдерді насихаттау және қалыптастыру болып табылады.

Әкелер институтын қолдау мен оны дамыту Министрліктің тұрақты назарында. Жыл сайын әкелер форумдарын республикалық, облыстық, қалалық деңгейде өткізу жақсы дәстүрге айналды. Балаларымыз лайықты азамат болып өсіп, ұлт болашағы жарқын болуы үшін ұрпақ тәрбиесіне бүгіннен ерекше көңіл бөлу қажет - деді Мәдениет және вице-министрі Е. Кочетов.

Іс-шарада «Орталық Азияның ер-азаматтары» кітабының тұсаукесері өткізілді. Бұл әңгімелер жинағында авторлар қазіргі қоғамдағы ер азаматтарға тән қасиеттер мен әке болудың әртүрлі қырлары туралы айтылған. Бұл жинақ БҰҰ халық қоныстану саласындағы қоры (UNFPA) шығарған «Ерлерге арналған нұсқаулық. Саналы әке қандай болу керек» атты әдістемелік құралына бейімделіп жасалған.  

Форум әр елдің өкілдері арасында тәжірибе мен ақпарат алмасу алаңына айнала отырып, олардың бір-бірімен пікір алмасуына және кәсіби дағдыларын дамуға ықпал етті.

Одан бөлек, форум аясында «Адал азамат» тұжырымдамасын дамыту мәселелері талқыланды. Іс-шараға қатысушылар адал азаматтың қасиеттері, отбасының заманауи бейнесін қалыптастырудағы БАҚ рөлі, ерекше бала тәрбиелеудегі әке мен ата-ананың рөлі және басқа да маңызды тақырыптарды талқылады.

Іс-шара қорытындысы бойынша әкелер институтын дамыту және осы саладағы қордаланған мәселелерді шешу жөнінде ұсынымдар мен сарапшылар пікірлерінің жиынтығы әзірленіп, мүдделі мемлекеттік органдарға орындау үшін жолданатын болады.

Естеріңізге сала кетейік, VII Республикалық Әкелер форумының нәтижесі бойынша елімізде маусымның үшінші жексенбісі Әкелер күні болып бекітілді.