Бұрынғы вице-министр Нұржан Әлтаев 10 жылға сотталды

Астанада бұрынғы депутат Нұржан Әлтаев 10 жылға сотталды, деп хабарлайды Skifnews.kz ақпарат порталы.

Оған қылмыстық кодекстің 366-бабының 4-бөлігі (аса ірі мөлшерде ақша түрінде пара алу) бойынша айып тағылған. Сот үкімімен экс-вице-министр Әлтаев ҚК-нің 366-бабының 4-бөлігінде көзделген қылмыстық құқық бұзушылық жасағаны үшін кінәлі деп танылып, 10 жыл мерзімге бас бостандығынан айырылды. Енді ол өмір бойы мемлекеттік қызметте қызмет атқара алмайды.

Үкім заңды күшіне енген жоқ.

Тағы оқи отырыңыз: Бұрынғы депутат Нұржан Әлтаев 12 жылға сотталуы мүмкін

Сот процесі басталған кезде Астана қаласының қылмыстық істер жөніндегі мамандандырылған ауданаралық соты Әлтаевқа қандай айып тағылғанын хабарлады.

Нұржан Әлтаев 2018 жылдың ақпанынан 2020 жылдың шілдесіне дейін «Атамекен» ҰКП мүдделері үшін тиімді ресми шешім қабылдауға ықпалдасып, делдал арқылы Абылай Мырзахметовтен пара ретінде жалпы сомасы 50 млн теңгеден астам (115 мың АҚШ доллары және 8 млн 150 мың теңге) қаражат алды деп айыпталып отыр, - делінген ақпаратта.

Еске салсақ, Сыбайлас жемқорлыққа қарсы іс-қимыл агенттігі 2023 жылдың 7 маусымында экс-вице-министр Нұржан Әлтаевты аса ауыр жемқорлық қылмысын жасады деген күдікпен ұстаған. 

Әлтаев 2018-2019 жылдар аралығында Еңбек және халықты әлеуметтік қорғау вице-министрі бола тұра, жүйелі түрде «Атамекен» ұлттық кәсіпкерлер палатасының басқарма төрағасы Абылай Мырзахметовтен пара ретінде ай сайын 5 000 АҚШ доллары мөлшерінде ақша қаражатын алып отырды деген күдікке ілінді. Кейіннен Әлтаев 2019-2020 жылдар аралығында Парламент мәжілісінің депутаты лауазымын атқарып, Мырзахметовтен пара алуын жалғастырған. Жалпы алғанда, ол пара ретінде 135 000 АҚШ долларын алған.

Алынған пара Нәтижелі жұмыспен қамтуға және жаппай кәсіпкерлікті дамытуға арналған «Еңбек» мемлекеттік бағдарламасы бойынша мемлекеттік тапсырысты алуға жәрдемдесуге, сондай-ақ Әлтаев жетекшілік ететін салаларда Мырзахметовке жалпы қамқорлық және мүдделеріне лобби жасауға бағытталған, - делінген хабарламада.