$ 444.22 € 476.38 ₽ 4.82
Ақтөбеде жоғалып кеткен 15 жасар оқушы қыз аман-есен табылды деп хабарлайды Diapazon.kz. Бұған дейін Таңшолпан есімді жеткіншектің із-түссіз жоғалып кеткені туралы ақпарат әлеуметтік желілер арқылы тараған болатын.
Ақтөбе облыстық ІІД баспасөз қызметінің хабарлауынша, полицейлер Таңшолпанды қаладағы жалдамалы пәтерлердің бірінен тапқан. Қазір ол ата-анасына беріліпті. Денсаулығына төніп тұрған ешқандай қауіп-қатер жоқ.
Тәртіп сақшыларының айтуынша, жеткіншек қыз бұған дейін де үйінен бірнеше рет қашып кеткен екен. Полицейлер қызбен және оның ата-анасымен түсіндіру жұмыстарын жүргізді.
Айта кетейік, Таңшолпан Айжанова 23 наурыз күні өз үйінен шығып, сол күйі хабарсыз кеткен еді. Ата-анасы оны туыстары мен құрбыларының үйінен іздеп шыққан. Алайда, іздеу жұмыстары нәтижесін бермегендіктен олар полицияға хабар беріпті.
