Ғалымдар миды 10 жылға жасартатын әдіс ойлап тапты

Альберт университетінің зерттеушілері Канада мен АҚШ-тың әріптестерімен бірлесе отырып, адам миын 10 жылға жасартатын жаңа әдіс ойлап тапты. Олар ғаламторсыз өмір сүрген адамдар арасында зерттеу жүргізіп, таңғажайып нәтижелерге қол жеткізді, деп хабарлайды Skifnews.kz ақпарат порталы.

Doctorpiter порталында жарияланған ақпаратқа сәйкес, ғалымдар арнайы қосымша орнатып, еріктілердің телефондарына интернетке қосылуға тыйым салды. Зерттеу екі аптаға жоспарланған болатын, бірақ көпшілігі бұл кезеңді аяқтамай, ерте бас тартты. Экспериментке қатысқан ерлер мен әйелдердің тек төрттен бірі ғана соңына дейін шыдады.

Зерттеушілер екі апта бойы интернеттен бас тартқан қатысушылармен сұхбаттасып, гаджеттерден бас тартудың психикаға үлкен әсер еткенін анықтады.

Алғашқы нәтижелерде барлық қатысушылардың өздерін әлдеқайда бақытты сезінгені байқалды. Олар интернетсіз өмірдің әлдеқайда жағымды екенін мойындады.

Екінші жағынан, қатысушылардың психологиялық жағдайы айтарлықтай жақсарғаны белгілі болды. Тіпті, бұл әсер терапия кезінде антидепрессанттардың әсерінен әлдеқайда күшті болған.

Үшіншіден, еріктілердің зейіні артты, ал олардың миы 10 жылға жасарды. Сондай-ақ, ұйқысы да айтарлықтай жақсарғаны байқалды.

"Экспериментке қатысушылардың 91 пайызынан осы оң әсерлердің кем дегенде біреуін байқадық. Цифрлық детокс психикалық денсаулыққа айтарлықтай әсер етті. Бұны барлық еріктілердің 70,5%-ы растады. Тіпті зерттеу шарттарын толық орындамағандар да айтарлықтай жақсару байқады. Бұл өзгерістер адамдардың офлайн қарым-қатынасқа, серуендеуге және спортпен айналысуға бөлетін уақыттарының көбеюі себепті болды", – деп түсіндірді эндокринолог.

Зерттеу авторлары қазіргі заманда телефонды толықтай қолданбау мүмкін емес екенін мойындайды. Дегенмен, әр адам әлеуметтік желілерде қанша уақыт өткізетінін қадағалап, күннің белгілі бір уақытында ғана интернетті пайдалануға шешім қабылдай алады. Мысалы, экран уақытын үштен бірге қысқарту да айтарлықтай нәтиже береді.