"Республикалық бюджеттен бөлінетін қаражат жеткіліксіз".
Абай облысының биылғы бірінші жартыжылдықтағы көрсеткіштері көңіл көншітпейді, деп хабарлайды Skifnews.kz ақпарат порталы.
Үкімет отырысында Премьер-министр өңірдің дамуы баяулап қалғанын айтып, жағдайды түзету үшін министрліктерге нақты тапсырма берді.
“Абай облысын қолдау керек. Бұл — жаңа құрылған өңір. Республикалық бюджеттен бөлінетін қаражат жеткіліксіз. Мұны ескеріп, қаржыландыруды арттырып, жан-жақты көмектесу қажет” — деді Премьер-министр.
Ол өңір әкімі Берік Уәлиден ахуалдың себебін сұрап, Үкімет мүшелеріне дереу шара қабылдауды жүктеді.
Айта кетейік, отырыста Ұлттық экономика министрі Серік Жұманғарин Қазақстан экономикасының өсімі 6,2% болғанын, инфляция жылдың соңына дейін 10%-ға дейін төмендеуі мүмкін екенін мәлімдеді.
Сонымен қатар, тарифтердің жоспарлы өсуі туралы да пікір білдірді.