«3 жасар қызының көзінше»: Атырауда күйеуі әйелін 28 жерінен пышақтап өлтірді

Атырау облысында 42 жастағы әйел өз үйінде аса қатыгездікпен өлтірілді. Қылмысқа қатысты негізгі күдікті ретінде оның азаматтық некедегі 38 жастағы жұбайы ұсталды. Ең ауыр жайт – қайғылы оқиғаға ерлі-зайыптылардың үш жасар қызы куә болған, деп хабарлайды Sn.kz ақпарат порталы.

Оқиға көпқабатты тұрғын үйдің бесінші қабатындағы пәтерде болған. Көршілердің айтуынша, сол күні пәтерден айқай-шу естілмеген. Марқұмның 16 жастағы қызы кешке үйіне келгенде анасын қанға боялған күйде тауып, жанында үш жасар сіңлісінің ұйықтап жатқанын көрген.

Марқұмның анасы Фатима Шмированың айтуынша, үлкен қызы қатты күйзеліске түсіп, анасына жақындай алмаған. Ал алғашында ештеңе айтпаған үш жасар қыз кейін болған оқиғаны полиция қызметкерлеріне баяндап берген.

«Қызым кейін "Әкем анамды пышақтады" деді. Ол оқиғаның қалай болғанын көрсетіп берді. "Әкем анамды ұрды, анам айқайлады. Мен жылай бастадым. Мен қатты жылағанда әкем қашып кетті" деп айтты», – дейді марқұмның анасы.

Тергеу мәліметінше, күдікті мен марқұм алты жыл азаматтық некеде тұрған. Әйелдің бұрынғы некеден туған екі ересек қызы бар. Ал кенже екі қызы анасымен бірге тұрған. Марқұм шағын кәсіппен айналысып, дүкен ұстаған.

Туыстарының айтуынша, әйелдің денесінен көптеген пышақ жарақаты анықталған.

«Суреттерді көрдік. Денесінің алдыңғы және артқы бөлігінде барлығы 28 пышақ жарақаты болған. Арқасының сау жері қалмаған, тіпті тамағын да кескен. Мұндай қатыгездікті түсіну мүмкін емес. Ол заң алдында лайықты жазасын алуы керек», – дейді Фатима Шмирова.

Жақындарының сөзінше, күдікті бұған дейін де жиі жанжал шығарып, марқұм бірнеше мәрте полициядан көмек сұраған. Алайда ер адам қайта оралып, отбасындағы кикілжің жалғаса берген.

Туыстары күдіктінің қылмыстан кейін төрт күн өткен соң ғана қолға түскенін айтады.

Атырау облыстық полиция департаментінің ресми өкілі Мейірім Ердәулеттің мәліметінше, күдікті уақытша ұстау изоляторына қамалып, оған қатысты Қылмыстық кодекстің «Адам өлтіру» бабы бойынша қылмыстық іс қозғалған.

Қазір марқұмның туыстары оның үш және 16 жастағы қыздарын өз қамқорлығына алуды жоспарлап отыр. Олардың айтуынша, ең алдымен балаларға психологиялық көмек көрсету мәселесіне басымдық беріледі.