Медициналық туризм: Оңтүстік Кореядағы конференцияда Қазақстан медицинасының артықшылықтары айтылды

Мемлекет басшысы «100 нақты қадам» Ұлт жоспарында Қазақстандағы медициналық туризмді дамытудың тетіктерін ойлап тауып, аталған саланы алдағы онжылдықта өркендету керектігін айтқан болатын. Өйткені, елімізге ем іздеп шетелден келушілердің саны өте аз, жоқтың қасы. Есесіне, қазақстандықтар ауруына шипа іздеп шетелге ағылып жатыр. Тиісінше, Қазақстанның ақшасы да сол мемлекеттерге құйылуда.

Осы кемшіліктің орнын толтыру мақсатында Денсаулық сақтау министрлігі медициналық туризмді дамыту үшін бірқатар шараларды қолға алған. Бұл ретте ең алдымен қазақстандық денсаулық сақтау саласының сапасын арттыру керектігі белгілі. Ол үшін Міндетті әлеуметтік медициналық сақтандырудың енгізілгенін де жақсы білеміз. МӘМС-ті енгізу арқылы Денсаулық сақтау министрлігі қомақты қаражат жинап, сол ақшаға емханалар мен ауруханалардағы медициналық қызмет көрсетудің сапасын арттырмақшы.

Қазақстанға шетелдік емделушілерді тартудың өзге де тетіктері қолға алынған. Атап айтқанда, отандық мамандар әлемнің дамыған елдерінде өтетін ірі шараларға қатысып, қазақстандық медицинаның жетістіктерін насихаттап жүр. Сондай шаралардың бірі Оңтүстік Корей елінде өтті.

Атап айтар болсақ, Денсаулық сақтауды дамыту республикалық орталығының өкілдері Сеулде өтіп жатқан «Жаһандық денсаулық сақтау және медициналық туризм» тақырыбындағы 8-ші конференцияға қатысуда.

Аталған конференция – Азия континентінде болып жатқан, денсаулық сақтау және медициналық туризм саласындағы соңғы инновациялармен және жаһандық трендтермен танысуға мүмкіндік беретін ірі шара. Бұған дейінгі «Medical Korea 2016» конференциясына әлемнің 25 елінен 2 мыңнан аса менеджер қатынасқан болатын.

Шараны Корея денсаулық сақтау индустриясын дамыту институты (KHIDI) Корея Республикасы Денсаулық сақтау министрлігімен бірлесіп ұйымдастыруда.

Бүгін жаһандық денсаулық сақтау маркерлеріне арналған тақырыптық сессиялар аясында ДСДРО бас директорының орынбасары Айман Ысқақова шетелдік әріптестеріне медициналық туризмді дамыту аясындағы қазақстандық денсаулық сақтау саласының артықшылықтарын, басым факторларын таныстырды.

Айман Ысқақова өз таныстырылымында атап өткендей, Қазақстан 9 басым факторға, яғни артықшылықтарға ие, оның ішінде сапалы қызмет көрсету үшін медициналық орталықтарды жабдықтауды, жоғары технологиялық қызметтер құнының қолжетімділігін, демалыс ұйымдастыру, туризм және спортпен айналысу үшін керемет табиғи ресурстарының болуын, елдің географиялық тұрғыда тиімді, ыңғайлы орналасуын, туристтер қауіпсіздігін қамтамасыз етуді, сондай-ақ түрлі археологиялық, тарихи, және мәдени ұлттық көрікті жерлерінің көптігін атауға болады.

«Қазақстанның денсаулық сақтау жүйесінің халықаралық сапа стандарттарына сай келуі айтарлықтай маңызды аспекті боп табылады», - деп атап өтті спикер. Қазіргі уақытта Денсаулық сақтауды дамыту республикалық орталығы ұлттық аккредиттеуші орган ретінде халықаралық тұрғыда танылды. Сондай-ақ, Қазақтанда Joint Commission International (JCI) халықаралық сапа стандарттары бойынша аккредиттелген 7 ұйым қызмет етеді. JCI аккредиттелген ұйымдар саны жағынан алып қарағандағы рейтинг бойынша біздің еліміз 25-орында.

Шара бағдарламасында қазақстандық менеджерлердің бірқатар семинарлар мен сессияларға қатысуы, делегациялардың KHIDI өкілдерімен бизнес-кездесулері, медициналық орталықтар мен көрмелерді аралауы жоспарланған.