Жаңалықтар 12.02.2020 сағат 14:20

Бас прокурордың орынбасары маңызды үндеуіне құлақ түруді сұрады

Құқық қорғау органдары осындай арандатушылық жарияланымдардың авторларының жеке басын анықтады, олар қылмыстық жауапкершілікке тартылуда.
Бас прокурордың орынбасары маңызды үндеуіне құлақ түруді сұрады
Фото: Sputniknews.kz
Бөлісу
Бөлісу
Бөлісу

ҚР Бас Прокурорының орынбасары Б. Дембаев Қордайдағы оқиғаға байланысты жалған ақпараттар таратқандардың қылмыстық жауапкершілікке тартылып жатқанын хабарлады. Оған қоса, заңдылықты, қоғамдық қауіпсіздікті қамтамасыз ету және құқық бұзушылықтардың алдын алу мақсатында еліміздің барлық тұрғындарына арнайы үндеу жолдады, деп хабарлайды Skifnews.kz ақпарат порталы. 

2020 жылғы 7 ақпанда Жамбыл облысының Қордай ауданында жаппай төбелес болғанын айта келе, осы оқиға аясында кінәлілердің жауапқа тартылып жатқандығын жеткізді.

"Бүгінге бірқатар қылмыстық істер тергелуде, олардың барысында барлық кінәлілерді анықтап, заңмен белгіленген жауаптылыққа тарту үшін шаралар қамтамасыз етілетін болады. Дегенмен, жекелеген тұлғалар болған оқиғаларды бұрмалай отырып, ұлттық негіздегі құқыққа қарсы әрекеттерге шақыру арқылы көрінеу жалған ақпаратты қасақана таратуда.

Әлеуметтік желілер мен мессенджерлерде бейне және аудиоматериалдарды орналастырудың жаңа фактілері, соның ішінде Қордай ауданындағы оқиғаларға байланысты емес және өңір мен елдегі ұлтаралық тұрақтылыққа қауіп төндіретіндер жүйелі түрде тіркелуде. Құқық қорғау органдары осындай арандатушылық жарияланымдардың авторларының жеке басын анықтады, олар қылмыстық жауапкершілікке тартылуда.
Алматы қаласында 1990 және 1987 жылдары туылған екі азамат «Facebook» әлеуметтік желісінде зорлық-зомбылық жасауға шақырған.

2020 жылдың 9 ақпанында Тараз қаласының 1983 жылы туылған тұрғыны «WhatsApp» мессенджері арқылы осы тектес шақырулар таратқан", - делінген Бас прокуратураның ресми сайтындағы хабарламада. 

 Сондай-ақ, оларға қатысты Қылмыстық кодекстің 272-бабының 3-бөлігі (азаматтарды зорлық-зомбылыққа шақыру) бойынша сотқа дейінгі тергеп-тексеру басталған.

"Заңдылықты, қоғамдық қауіпсіздікті қамтамасыз ету және құқық бұзушылықтардың алдын алу мақсатында еліміздің барлық тұрғындарынан менің үндеуіме көңіл аударуды сұраймын! ҚР Конституциясының 39-бабы ұлтаралық келісімді бұзатын кез келген іс-әрекеттерге тыйым салады. Осы талапты бұзу ұлттық араздықты және алауыздықты қоздыру жөніндегі қасақана іс-әрекеттер (ҚК-тің 174-бабы), жаппай тәртiпсiздiкке не азаматтарға зорлық-зомбылық жасауға шақыру (ҚК-тің 272-бабы) және көрінеу жалған ақпарат тарату (ҚК-тің 274-бабы) қылмыстық жауаптылыққа әкеп соғады. Осыған байланысты азаматтарды шындыққа сәйкес келмейтін мәліметтерді таратпауға және арандатушылыққа берілмеуге шақырамын!

Жамбыл облысының Қордай ауданындағы оқиғалар бойынша тергеу барысы мен нәтижелері туралы шынайы ақпарат бұқаралық ақпарат құралдарында, ішкі істер және прокуратура органдарының ресми Интернет-ресурстарында орналастырылуда, қоғамға брифингтерде жеткізілуде. Құқық қорғау органдары кез келген құқық бұзушылықтардың жолын кеседі және оларды болдырмау жөнінде заңда көзделген шараларды қабылдайды", - деді үндеуінде Бас Прокурордың орынбасары Б. Дембаев.

 

Оқи отырыңыз

загрузка...

Соңғы жаңалықтар

Аптасына бір рет ең танымал мақалалардың дайджесін жібереміз

Қызықты материалдар