«Орыстың қоқсығы» атанған көлік: ұлы Абайдың атын LADA Granta-ға бекер қор қылып отырмыз

Соңғы ақпараттарға сенсеңіз, һәкім Абайдың аты енді ел аузында «орыстың қоқсығы» атанған LADA Granta көліктеріне берілмек. Үлкен дақпырттың даңғыры – ақынның мерейтойы үшін деп тұр. Жат та күл, тұр да күл: арнайы Абай тойы үшін шығарылмақ бұл «сыйлық». Қазақстан көлік өндірісінің сіз бен біз қабылдай алмайтын көркем иллюзиясы осы.

«Абайға» мін де шаба бер. қазақтың һәкімінің есмі енді орыстың көлік өндірісіндегі «Гранта» деген бір ұрпағына ат болуға да «жарады» емес пе?! Осы ретте, қазақстандық «Азия Авто» зауытының «еңбегін» айрықша атап өтпей болмас. Олар Абай тойы туралы төгіліп мақала жазған Тоқаевтың: «Бірақ, мұның бәрі той тойлау үшін емес, ой-өрісімізді кеңейтіп, рухани тұрғыдан дамуымыз үшін өткізілмек» деген сөзіне «тірі» пародия жасап берді деуге де болады.

«Пародия» емей немене, оның жыры да басталар енді. Мәселен, сіз алда-жалда сол арнайы шығарылған көлікті сатып алдыңыз делік. Онсыз да сапарда жұрттың сенімі аз артылатын «Ладаңыз» сыр бермесіне кім кепіл? Сонда сіз жақыныңызға: «шағылғыр «Abai» жолда бұзылды» деп бір айтарсыз әуелі. Соңындағы «175» деген цифр сорың қайнаған далада әдірәм қалып ( арнайы шығарылған серия «Abai 175» деп аталады – ред.).

Мүбәдә, «Абай» деп әспеттеген әлгі «Гранта» айдауға келмесе ше? Онда «Абайдың» астынан май ағып тұр» немесе «Абай» қуып тұр» дейтін қуарған тіркестер сіздің көмейіңізде тұруы ләзім. Бәлкім, ашуың түссе «Абайды» өртеп жіберердей боқтарсың келіп-келіп. Мұны айтқызған орыстың «әдепсіз» көлігі сізге тағы бір күні: «Абай» шіріп кетті» деп айтқызбайды деп кім айтты?!

Бақсаңыз, Абайға көрсеткен құрметіміздің сыйық-сықпыты осы... «майы аққан «Абай», «қуған «Абай», «шіріген «Абай». Сосын «көп айдалған «Абай», өкінішке қарай.

Міне, Мемлекет басшысы өз мақаласында айтқандай, біздің «рухани жаңғыру», «саналық өсу» екен бұл. Айтпақшы, Президент сол мақаласында тағы: «Біз Абайдың 175 жылдық мерейтойына қоғамдық сананы жаңғыртатын, бір ел, тұтас ұлт болып дамуымызға серпін беретін іс-шара ретінде зор мән беріп отырмыз» деген еді. Қайталап айтамыз: «зор мән беріп» деп тұр.

Тағы оқи отырыңыз: «Abai175»: LADA Granta автокөліктеріне ұлы ақынның есімі берілді (ФОТО)

Енді нәтиже дейсіз бе? Дап-дайын ол да. Біздің қоғам болып қатты «мән» бергеніміздің арқасында ақын Абайдың аты автокөлік «Абай»-ға айналды сөйтіп. Ол, тіпті, сізге «қолжетімді» де. Өз «Абайыңызды» ақпаннан бастап 2 млн 820 мың теңгеге сатып алыңыз да айдай жөнеліңіз. Майы аққанша айдай жөнеліңіз...

Қозыбай ҚҰРМАН