Жаңалықтар 13.11.2020 сағат 23:03

Жетісайда қаржы пирамидасын ұйымдастырған күдіктілер ұсталды

Олар тұрғындарға 1,5 млрд теңге шығын келтірген.
Жетісайда қаржы пирамидасын ұйымдастырған күдіктілер ұсталды
Бөлісу
Бөлісу
Бөлісу

Түркістан облысында тұрғындарға 1,5 миллиардқа жуық шығын келтірген «Indigo-24 Evolution» қаржы пирамидасын ұйымдастырған 12 күдікті ұсталып, қамауға алынды.

Еске сала кетейік, өткен жаз айларында полиция қызметкерлері Жетісай қаласындағы «Indigo-24 Evolution» қаржы пирамидасының қызметін тоқтатты. Бұл жайт ҚР Қылмыстық кодексінің 217-бабы 3-бөлігі (Қаржылық (инвестициялық) пирамиданы құру және оған басшылық ету) бойынша тіркелді. Бір ай өткеннен соң жәбірленушілер саны 300-ден асты.

Жетісай аудандық полиция бөліміне Шымкент қаласынан пирамида жасады деген күдікпен Жетісай ауданының тұрғыны – қаржы пирамидасының директоры жеткізілді. Оның екі сыбайласы - Мақтаарал ауданының тұрғындары да ұсталды. Тергеу барысында кеңсеге тінту жүргізіліп, құжаттар, жабдықтар, компьютерлер және басқа да айғақты заттар тәркіленді. Іздестіру нәтижесінде алдымен 5 күдікті, кейіннен 7 күдікті ұсталды. Олар Жетісай, Шардара, Мақтаарал, Сарыағаш аудандары тұрғындарының ақшасын алып, қайтармаған.

«Indigo-24 Evolution» қаржы пирамидасы 2015 жылы Алматы қаласында құрылған. Оның негізін қалаушы мен ұйымдастырушысы ретінде ұсталған күдіктілер туыс болып келеді. Олар Түркістан облысында бірнеше тұрғынды ұйымның директоры ретінде тағайындап, 1 млн теңгеден ақшасын алып, еселеп қайтарамыз деген құрғақ уәдемен алаяқтық істерін жүзеге асырған. Бүгінде жәбірленушілер саны 1500-ден асты. Олардың барлығының арызы заңды түрде тіркелген. Ұсталған 12 күдікті де сот санкциясымен қамауға алынды. Әзірге белгілі болған шығын көлемі 1 миллиардтан астам теңгені құрайды. Арызданушылар мен күдіктілер саны артуы, шығын көлемі де өсуі мүмкін», - дейді Түркістан облысы Полиция департаменті тергеу басқармасының бастығы Нұрмахан Жалғасов.

Салымшылардың басым бөлігі күдіктілердің сөзіне сеніп, алданып, сол үшін несие алған. Қазірге дейін анықталған салымшылардың салған ақшасы 1 миллион теңгеден 10 миллион теңге аралығында болып отыр. Тағы да айта кететін жайт, күдіктілердің аттарына тіркелген мүліктер анықталып, сотпен санкцияланған.

Оқи отырыңыз

загрузка...

Соңғы жаңалықтар

Аптасына бір рет ең танымал мақалалардың дайджесін жібереміз

Қызықты материалдар