ЕАЭО мен Қытай арасында валюта жүйесін құру мәселесі қаралып жатқаны рас па?

ЕАЭО мен Қытай арасында тәуелсіз халықаралық валюта жүйесін құру мәселесі қаралып жатқан жоқ. Бұл туралы премьер-министр орынбасары, сауда және интеграция министрі Бақыт Сұлтанов мәлімдеді, деп хабарлайды Sputnik Қазақстан.

Бұған дейін ЕАЭО мен Қытай тәуелсіз халықаралық валюта жүйесі жобасын әзірлейтіні хабарланды. Жүйе жаңа халықаралық валютаға негізделетіні, алғашқы жоба наурыз айының соңына дейін ұсынылатыны айтылған еді.

Бүгін, 15 наурыз үкімет кулуарында сауда министрі Бақыт Сұлтанов күн тәртібінде мұндай мәселе жоқ екенін мәлімдеді.

"17-18 наурызда Мәскеуде Еуразиялық экономикалық комиссия кеңесінің отырысы жоспарланған. Мен комиссия мүшесімін. Қазір күн тәртібінде бұл мәселе тұрған жоқ", - деді министр.

Сұлтанов санкцияларға байланысты есеп айыруда қиындықтар бар екенін мойындады.

"Біздің елдер арасында, мысалы, доллармен есептескенде қиындықтар бар. Өйткені оларды Ресейге кіргізуге тыйым салынған. Сондықтан, өзара есеп айырысуға қатысты, әсіресе бизнесте, консультациялар өтеді, мәселелер талқыланады. Бірақ сіз айтқан мәселе (тәуелсіз халықаралық валюта) күн тәртібінде тұрған жоқ", деді министр.