«Жолдау күзгі саяси маусымның негізгі жаңалығы болғалы тұр» - сарапшы

Күні кеше Президент Қасым-Жомарт Тоқаевтың жыл сайынғы халыққа Жолдауы 1 қыркүйекте жарияланатыны белгілі болды. Бұл жолғы Жолдауда басымдық елдің әлеуметтік-экономикалық даму саласына берілмек. Осы орайда саясаттанушы, Қазақстан Республикасы Президентінің жанындағы ұлттық қоғамдық сенім кеңесінің мүшесі Андрей Чеботаревтың ойын білген едік. 

«Мемлекет басшысы Қасым-Жомарт Тоқаевтың Қазақстан халқына таяу болашаққа арналған саяси күн тәртібін белгілейтін жаңа Жолдауы күзгі саяси маусымның негізгі жаңалығы болғалы тұр. Оның үстіне, биылға бұл Мемлекет басшысының екінші Жолдауы. Біріншісінің мазмұнын және қазіргі жағдайларды ескере отырып, алдағы Жолдаудың экономикалық және әлеуметтік сипаттағы міндеттерді шешуге көбірек бағдарланатыны айтпаса да белгілі.

Менің ойымша, Мемлекет басшысының белгілі бір проблемаларды белгілеуіне және Үкіметтің жауапкершілік деңгейіне байланысты бүкіл үкіметті немесе оның әлеуметтік-экономикалық блогының өкілдерін ауыстыру туралы мәселе туындауы мүмкін. Әлихан Смайыловтың Үкіметі қаңтардағы оқиғалардан кейін елдегі жағдайды тұрақтандыру мақсатында құрылғаны анық. Алайда, биылғы сыртқы сын-қатерлер Қазақстан экономикасы үшін оның қызметіндегі жаңа күн тәртібін және оны іске асыруға қабілетті адамдарды тарта отырып, кадрларды жаңартуды талап етеді», - дейді ол.

Саясаттанушы қазір қаралып жатқан түрлі конституциялық заңдарға да тоқталды.

«Парламенттің сайлау, президент, парламент және оның депутаттарының мәртебесі туралы Конституциялық заңдарға түзетулер пакетін қарауы және қабылдауы өзекті мәселелердің бірі. Бұл ретте парламентарийлер мен қалың жұртшылық арасында сайлау туралы заңға түзетулер енгізу мәселесі неғұрлым ауқымды пікірталас тудырмақ. Осыған байланысты олардың түпкілікті басылымы көбінесе билік пен азаматтық қоғам арасындағы ымыраға келуге байланысты болады. Сонымен қатар, бұл пікірталастар мен олардың нәтижелері билік жүйесіндегі реформаторлар мен консерваторлардың арақатынасын анықтайды», - дейді сарапшы. 

Андрей Чеботарев кезектен тыс парламенттік сайлаудың өтуіне қатысты күмәні бар екенін айтады.

«Менің сайлаудың биыл өтетініне күмәнім бар. Елдің партиялық спектрі қалыптастырылмаған, жаңа саяси партиялар қалыптаспаған, ал әрекет етушілері қайта құрылымдаудан өтпеген, тіпті «Аманаттың» өзі де. Екінші жағынан, наурыздағы Жолдауда қабылданған барлық заңдар пакетінің қабылдануын қамтамасыз ету қажет. Сонымен қатар, экономикадағы жағдай мәз емес, өйткені кез келген сайлау – бұл бюджетке ауыр жүктеме», - дейді ол.