Жаңалықтар 28.08.2022 сағат 16:40

Түркістан облысында ежелгі ғибадатхана табылды

Көне нысан екі мың жыл бұрын өмір сүрген Кангюй тайпасына тиесілі болуы мүмкін.
Түркістан облысында ежелгі ғибадатхана табылды
Бөлісу
Бөлісу
Бөлісу

Түркістан облысында археологтар ежелгі ғибадатхананың орнын тапты, деп хабарлады «Хабар 24».

«Көне нысан екі мың жыл бұрын өмір сүрген Кангюй тайпасына тиесілі болуы мүмкін. Өйткені археологтар дәл осы тайпаның тарихы толық зерттелмегенін айтады. Яғни бұл өңірде әлі талай ашылмаған сыр жатыр. Археологтар соңғы жылдары Созақ ауданына қарасты Қызылкөл маңында құнды олжаға кенелуде. Тасын түртсең тарих теберігі шығатын аймақта бұл жолы көне заманға тиесілі ғибадатхана табылды. Археологиялық жәдігер зерттеушілерді қатты қызықтырып отыр», - деп хабарлайды телеарна.

«Біріншіден, бұл Қазақстан аумағында табылған алғашқы нысан. Күн символикасы мен сәулет өнері Кангюй тайпасына тиесілі ғибадатхана екенін көрсетіп отыр. Дінге қызмет етушілер осында әдейі жолданған болуы мүмкін. Ғибадатхана аумағы әлі де зерттеу жұмыстарын талап етеді. Әзірге тек жер бедерінің үстіңгі қабаты ғана ашылды. Белгілі болғандай сәулет өнеріне пайдаланылған құрылыс бөлшектері оңтүстік өлкеге тиесілі емес. Беріктікті қамтамасыз еткен тастар арнайы жеткізілуі мүмкін», - дейді Оңтүстік Қазақстан мемлекеттік педагогикалық университетінің профессоры Александр Подушкин.

Археологиялық қазбаның нәтижесінде табылған ғибадатхана аумағында мыңдаған керамикалық бөлшектерді көруге болады. Мамандар құмыра сынықтарына үңіліп оның су мен дәнді дақылдарды сақтауға арналғанын анықтады. Тарихы терең құнды олжаларды іздеу жұмыстары әлі де жалғасатын болады. Археологиялық аумақта алтын мен күміс металды балқытуға арналған тигель де табылды. Мамандар жабдықты дін өкілдері қолданған болуы мүмкін деп топшалап отыр.

Ал ғибадатханаға жақын жерде сол заманда жерленген екі адамның қорымы бар. Онда тас пен шыныдан, сүйектен жасалған тарихи маңызға ие жүздеген жәдігер табылды.

«Ең бірінші табылған жәдігер қоңырау болды. Оның маңында әйелдің қасын бояуға арналған зат табылды. Кейін моншақтар мен бұйымдардың шоғарын кездестірдік. Адамның бас сүйегі мен жақ сүйегі де табылды. Біз оны қайта жинақтауға тырыстық. Енді ғибадатхана аумағынан табылған жәдігерлерге орталықта арнайы зерттеу жүргізіледі. Мамандар келесі жылы Қызылкөл маңында қазба ісі қайта жалғасатынын айтады», - дейді ОҚМПУ студенті Екатерина Кесман.

Оқи отырыңыз

загрузка...

Соңғы жаңалықтар

Аптасына бір рет ең танымал мақалалардың дайджесін жібереміз

Қызықты материалдар