Риддерде тағы апат: Қала әкімі мәлімдеме жасады

Риддер қаласындағы жылу электр орталығында тағы да ақау шығуына байланысты қала әкімі Дмитрий Горьковой ресми мәлімдеме жасады, деп хабарлайды Ulysmedia.kz.

Қала басшысының айтуынша, қазіргі уақытта орташа қысымды 3 қазандық жұмыс істеп тұр. Апатты жоюға қажет мамандар мен жабдықтар жұмылдырылған.

«9 қарашада жылу электр орталығындағы №6 жоғары қысымды қазандық іске қосылған болатын. 10 қараша күні түнгі сағат 01:00-де температурасы 65 градусқа жеткен №6 қазандық апатты жағдайда сөндірілді. Бірден жөндеу жұмыстары басталып кетті», – деді қала әкімі.

Еске сала кетсек, 5 қарашада «Риддер ЖЭО» АҚ-да күл шығару жүйесіндегі сорғы істен шығып, нәтижесінде №1 қазандық блогының қосалқы жабдықтары апатты жағдайда тоқтап, салқындатқыш сұйықтықтың температурасы төмендеген еді. Осыған байланысты қаланың 22 мыңнан астам абоненті жылусыз қалған.