$ 444.14 € 477.05 ₽ 4.85
Алматы мен Нұр-Сұлтан қалаларында 3 мың экспресс-тест алынды. Бұл туралы ОКҚ-да онлайн режимде өткен баспасөз мәслихатында ҚР ДСМ Тауарлар мен көрсетілетін қызметтердің сапасы мен қауіпсіздігін бақылау комитетінің төрағасы Людмила Бюрабекова мәлімдеді, деп хабарлайды aikyn.kz.
«Коронавирус бойынша экспресс-тест Алматы мен Нұр-Сұлтан қалаларында жүргізіліп жатыр. Сонымен қатар, шекаралардағы санитарлық-өткізу пунктерінің бәрі де экспресс-тестпен қамтамасыз етілген. Ол жерде кіргендердің бәріне экспресс-тест жүргізіледі. Одан бөлек, біздің меценаттардың қаражатымен 270 мың тест сатып алынған болатын», – деді Людмила Бюрабекова.
Комитет төрағасының айтуына қарағанда, Денсаулық сақтау министрлігі экспресс-тесттен өтуі тиіс азаматтардың санатын айқындап, бекітіп қойған.
«Бүгінгі күні 3 136 экспресс-тест жүргізілді. Оның 354-і Қазақстанның автокөлік бекеттерінде, 2782-сі медициналық ұйымдарда жасалды. 64 адамда антидененің бары анықталды. Яғни, олардың бәрі – коронавирус инфекциясымен ауырып, жазылып кеткендер. Оларды енді ары қарай бекітілген алгоритм бойынша ПТР-тесттен өткіземіз», – дейді ол.
Еске сала кетсек, «Олимп» клиникалық-диагностикалық зертханалары 13 сәуірден бастап Нұр-Сұлтан мен Алматы қалаларында коронавирус бойынша тегін тестен өтуге болатынын жария еткен болатын.
