«Жылқы шаруашылығын да субсидиялап отырмыз»: АШМ «шошқа дауына» қатысты түсінік берді

Кеше елімізде шошқа баққан шаруаларға берілетін қайтарымсыз мемлекеттік субсидия көлемінің әлеуметтік желілерде қызу талқыға түскені мәлім. Содан кейін Ауыл шаруашылығы министрлігі журналист Мақсат Толықбайдың facebook парақшасындағы уәжіне жауап ретінде мемлекеттік субсидиялар туралы түсінік берді, деп жазады Skifnews.kz ақпарат порталы, АШМ баспасөз қызметіне сілтеме жасап.

Еске сала кетсек, Мақсат әріптесіміз: «Біз айтамыз ғой, қазақ халқы үшін жылқының орны бөлек, жылқы деген малдың патшасы, кезінде ата-бабаларымыз аттың үстінде отырып осы бір ұлан-байтақ жерді қорғап қалған деп. Бірақ, бұдан былай мемлекет жылқыға бір теңге, тіпті, бір тиын субцидия бөлмейтін болды. Тіпті, ұсақ мал – қойдың өзінің жем-шөбіне деп жылына төрт-ақ мың теңге бөледі. Ал бұл субсидиялардың барлығы қайда кетіп жатыр дейсіз ғой?! Оның барлығы шошқа шаруашылығын дамытуға жұмсалмақ. Яғни, бұдан былай бір шошқа сатып алатын болсаңыз, мемлекет сізге 140 мың теңге ақша береді. Әрі ол қайтарымсыз ақша», - деп қынжылыс танытқан еді.

Енді соған байланысты министрлік тарапынан таратылған ақпаратты қараңыз:

«Мемлекеттік қолдау мен субсидиялаудың арқасында республикада жылқы саны кеңестік кезеңге қарағанда 1,7 есе көбейді.

1991 жылы Қазақстандағы барлық санаттағы шаруашылықтарда жылқы саны шамамен 1,7 млн бас болды. Одан кейінгі нарықтық экономикаға көшу кезінде мал саны күрт азайып, 2000 жылға қарай республикадағы жылқы саны миллионға да жетпей қалған.

Мемлекет 2002 жылдары қолдау көрсете бастағаннан кейін мал санында өсім байқалды. Асыл тұқымды жылқыларды сатып алуға, қымыз бен жылқы етін өндіруге субсидия түріндегі мемлекеттік қолдау 2011 жылы іске қосылды.

Қабылданған шаралардың нәтижесінде, Қазақстанда бүгінгі таңда жылқы саны 2,9 млн басқа дейін өскен (жыл басындағы мәліметтер бойынша). Бұл 1991 жылғы жылқы санынан 1,7 есе, ал 2000 жылмен салыстырғанда, 3 есе көп. Тиісінше, жылқы шаруашылығы мен бие сүтінің өндірісі дамып, асыл тұқымды жылқылардың саны артты. 2011 жылдан бастап мемлекет сатып алуды субсидиялап, олардың үлесі 1,9 есе өсті.

Бүгінгі таңда мемлекет жылқы шаруашылығымен айналысатын отандық тауар өндірушілерге қолдау көрсетуді жалғастыруда. Атап айтқанда, олар үшін төмендегідей мүмкіндіктер қарастырылған:

сатып алынған асыл тұқымды айғырлар үшін субсидиялау нормасы әр басқа 100 мың теңгеден;

бие сүтін өндірушілер үшін әр литріне 60 теңгеден;

асыл тұқымды жылқының аналық басын бағуға, жем-шөбіне жылына 20 мың теңгеден;

жылқы шаруашылығын дамытуға арналған техникалар мен жем-шөп дайындайтын жабдықтарды сатып алғанда мемлекет 25 пайыздық өтеу үлесімен инвестициялық субсидия береді;

несиелер мен лизинг бойынша пайыздық мөлшерлемелерді 10% субсидиялау.

Бұл қолдау шараларының барлығы жылқы фермалары мен салалық қауымдастықтардың ұсыныстары бойынша жасалған. Жалпы алғанда, 2019 жылы 4,7 мың жылқы фермалары мемлекеттік қолдау шараларымен қамтылды.

Сонымен қатар, жоғарыда аталған қолдау шараларына қосымша, жылқы өсірушілерге «жылқы сатып алуға» 10 жылға дейінгі 6% жылдық жеңілдетілген несие беру қарастырылған. 2016 жылдан бері «Құлан» бағдарламасы жұмыс істеп келеді. 2018 жылы 12 мың бас мал сатып алуға 512 шаруашылық қаражат алды. Былтыр 1440 шаруашылыққа 40 мыңнан астам жылқы сатып алуға жеңіл несие берілген. 2020 жылы қаржылық қолдау алушылардың саны едәуір артады деп күтілуде.

Бұл ретте жылқы еті тек ішкі нарыққа бағытталған өнім екенін атап өткен жөн. Экспорттық нарық мүлде жоқ деуге де болады.

Осы орайда, қоғамда түрлі пікір тудырған тақырып бойынша мынандай ақпарат ұсынамыз. Мемлекет әрқашан экономикалық тұрғыдан тиімді болу үшін көршілес елдердің сұранысына мән беріп, нарықтағы тұтынушы талабын ескереді.

Қазақстанда 2018 жылдан бастап шошқа етін өндіруді субсидиялау тоқтатылған. Бұл шошқа өндірісіне мемлекеттік қолдаудың жалпы көлемінің 2 есе азайғанын көрсетеді. Қазіргі уақытта салада тек 2 субсидия бар: асылдандыру мен өсіруге кеткен шығындарды өтеу. Алайда, өткен жылы бұл субсидияны тек бір шаруа қожалығы ғана пайдаланып, небары 6 бас мал алынды.

Тағы оқи отырыңыз: «Босқа байбалам салудың қажеті жоқ»: АШМ шошқа бағу үшін ешкімнің субсидия сұрамағанын айтты

Салыстырмалы түрде, 1991 жылы Қазақстанда 2,9 миллион бас шошқа болған, ал 2018 жылы 800 мың ғана. 2019 жылға қарай Қазақстандағы шошқа санының артуы шошқа еті экспортының өсуіне әсер етті. Егер 2017 жылы Қазақстан шетелге 300 тоннаға жуық ет сатса, былтыр ол 800 тоннаға жетті. Осы кезең ішінде шошқа етінің ішкі тұтыну үлесі 8% төмендеді».