Саясат 19.06.2020 сағат 01:40

Сенатор «жалпыұлттық курорт» атанғанына 100 жыл толған Бурабайдың ластығына қынжылды

«Жалпы, тек қана Бурабай емес, Қазақстанның кез келген өңіріне барсаңыз, не көп, қоқыс көп. Тастайтын да өзіміз, ластайтын да өзіміз! Соншама ластайтындай, осыншама қорлайтындай туған жеріміздің не жазығы бар?» - деп сауал жолдады депутат Үкімет басшысына.
Сенатор «жалпыұлттық курорт» атанғанына 100 жыл толған Бурабайдың ластығына қынжылды
Бөлісу
Бөлісу
Бөлісу

Сенаттың кезекті отырысында депутат Нұртөре Жүсіп Үкімет басшысы Асқар Маминге экология мәселелері бойынша депутаттық сауал жолдады. Сенатор жалпыұлттық курорт атанғанына 100 жыл толған Бурабай Ұлттық паркінің тазалығы сын көтермейтінін айтып, тазалық мәдениетін қалыптастыруға күш салуды сұрады.

«Ал осы Бурабайға барғанда біз не көреміз? Қаптаған қоқыс. Шашылған заттар. Пластикалық бөтелке, умаждалған пакеттер. Көлдің суы лас. Қандай керемет демалыс аймағы! Қадірін неге білмейміз? Мемлекеттік Ұлттық табиғи парктің тазалыққа жауапты тиісті бөлімдері мен құрылымдары бар. Қоқыстан аяқ алып жүре алмайтын жағдайға жеттік. Бурабайда демалушылар тастаған тұрмыстық қалдықтар мен қоқыстар туралы әлеуметтік желіде таралған бейнеролик соның дәлелі. Бұл қалай?!» – деді Нұртөре Жүсіп.

Сенатор бұл келеңсіздікке ең алдымен тынығушылардың өздері кінәлі екенін айтты.

«Жалпы, тек қана Бурабай емес, Қазақстанның кез келген өңіріне барсаңыз, не көп, қоқыс көп. Тастайтын да өзіміз, ластайтын да өзіміз! Соншама ластайтындай, осыншама қорлайтындай туған жеріміздің не жазығы бар? Жер – біздікі! Ел – біздікі! Қазақстанға шетелден алғаш оралған ақсақал ұшақтан түсе салып, туған жерді сүйгені естеріңізде бар ма? Туған жерге деген осындай іңкәрлік неге жоқ бізде? Қазақ халқы – осы мемлекеттің иесі. Біз бәріне жауапты ұлтпыз. Ұлттық санамызды өзгертейік! Табиғатты таза ұстау үшін жанымызды таза ұстайық! Жаппай тазалық мәдениетін қалыптастырайық! Даламыз да, қаламыз да таза болсын!» – деді Сенат депутаты.

Асқар Маминге сауал жолдаған ол Үкімет арнайы шараларды қарастыруы керек деп есептейді.

«Мемлекеттік тұрғыдан шұғыл түрде тазалықты сақтау, бақылау, реттеу тетіктерін жетілдіру қажеттігі білініп отыр. Сізден осы мәселені қарап, Үкіметтің тиісті құрылымдары арқылы өз құзыреттері шеңберінде іс-шаралар кешенін жедел қабылдауды сұраймыз.

Сондықтан қоршаған ортаға қатысты мемлекеттік саясаттың толық іске асырылуын қамтамасыз ету туралы орталық және жергілікті атқару органдарына арнайы тапсырма берсеңіз деген ұсынысымыз бар. Әрине, бәрін мемлекетке, Үкіметке артып қою аздық етеді.

Елдің белсенді, саналы азаматтарына, зиялы қауымға, жер-жердегі батагөй ақсақалдарымыз бен өскелең жас ұрпаққа көп нәрсе байланысты. Туған жерімізді таза ұстау туралы Қазақстан Үкіметі арнайы шара қабылдамаса болмайды. Тек қана демалыс аймақтарында емес, тұтас республика территориясында «Туған жерді таза ұстау» жалпыұлттық акциясын ұйымдастыру керек. Бұл тұрақты өтетін шара болуы қажет», – деді сенатор.

Еске сала кетсек, өткен демалыста белгілі саяхатшы, Қазақстан ұлттық география қоғамының өкілі Нұржан Алғашов Бурабай демалыс аймағының қоқыстың астында қалғанын әлеуметтік желіде жазып, әкімдікті сынға алған болатын.

Дереккөз: aikyn.kz

Оқи отырыңыз

загрузка...

Соңғы жаңалықтар

Аптасына бір рет ең танымал мақалалардың дайджесін жібереміз

Қызықты материалдар